Read Kok Borok JOB 32 Bible Online

JOB 32 - Kok Borok bible

JOB 32

¹Hakhe o khorokthamrok Jobno sama thák kha, tamni hwn ba bo bini sakni mokolo kaham hwnwi uansugo.

²Hakhe Ramni bosongni Bujitsa Barakhalni bwsla Elihu jolijak kha. Job sak sakno Kaitorni slái kaham hwnwi sama bai se bo jolijago;

³Bo Jobni tei khorok tham kichingsongnobo Jobno cha ya hwnwi sa phano, bórok Jobni kókrokno mungsa uphilwi saui man yani bagwi jolijak kha.

⁴Aphuru khe Elihu bórokni slái kusuni bagwi bórok Job bai sa laigra si thung hwnwi naisingwi tong kha.

⁵Tamo khe Elihu a khorok thamrokno mungsa sama nuk li ya hwn khe bo jolijak kha.

⁶Bujitsa Barakhalni bwsla “Ani umor kisa, norok le chakra gwja; aboni bagwi ang norokno ani kók sana bagwi lachiui kiriui tongmani.

⁷Ang sa kha, ‘Salrok se sa thung tei bisi kwbángma se simungrok sa thung.’

⁸Tamo khe, Kwplaisani rangma se thwiblang borokni thani tongwi bórokno simung rw-o.

⁹Chakra wng kheno simung gwnang eba umor kwbáng wngma bai sói chamarokno sinai wngnai ahai ya.

¹⁰Aboni bagwino ang sa-o, ‘Ani kókno khna gra di; anobo ani sajaknaino sa rw gra di.’

¹¹“Nai di, ang nini kókrokno naisingwi tongo, nwng tamo sanai hwnwi naitugwi kók sa phuru, ang nini simungni kókrokno sama khna kha.

¹²Ang nini kókrokno kaichomwi nai kha, tamo khe norokni bere khoroksa phano Jobno cha ya hwnwi phunugui man li ya eba bini kókroknobo uphilwi saui man li ya.

¹³Hai phano norok, ‘Chwng simungno man kha; borok ya Kaitor se bono mecheno,’ hwnwi sa lai ya.

¹⁴Bo ang bai abo hai khe kók tan lai khe, nwng sama tẃi khe le sa glak.

¹⁵“Bórok mok kha, sanani kwrwijak kha; thái sabo sanani kwrwi kha.

¹⁶Bórok siring siring tongo hwnwi ang naising tongnai de? Bórok aro bachaui tong kha, tei kók uphilwi sa li ya.

¹⁷Ang bo ani sajaknaino uphilwi sanai; angbo ani sajaknai tongmarokno sakhlainai.

¹⁸Ani Kwbángma kókrok sajaknai tongo; abo ani bwkha dusa rwui ton kha.

¹⁹Ani bwkha le arak muthupjak ya hai se; arak tongjaknai bukurni sola kwtal pekhokna naiwi tongma hai wng kha.

²⁰Ani bwkha asi yókna bagwi ang kók ma se ma sanai; ang búkhúk kiyogwi kók ma se ma sanai.

²¹Ang khoroksanobo mwkhang naiwi sa glak, eba khoroksano phano kók bai bandi glak.

²²Tamni hwn ba bahai khe bandi ang rwng ya, eba ano Snamnaisa dakti’-no ano butharwi páinai!