Read Kok Borok JOB 33 Bible Online

JOB 33 - Kok Borok bible

JOB 33

¹“Tamo khe o Job nwng tabuk ani samano khna di tei bebak kókrokno khunju kan di.

²Nai di, ani búkhúk khulok kha, ani kókrok sa phigrana.

³Ang bwkha sói kheno sakhlai-o, ani simano’-no búkhúk bai bwkha srai-srai khe sa-o.

⁴Kaitorni phola ano snam kha tei rangma na rwui tongo, kwplaisani rangma se ano kwthang khlai-o.

⁵Man khe ano uphilwi sa di; nini kókrokno khrop-khrop khe sa di; nini kógo bachasa di.

⁶Nai di, Kaitorni thani angbo nwng haino; angbo ha bai’-no takjak.

⁷Nwng ano kirina nang glak; nini thani ang belai hilikbo wng glak.

⁸“Ao, ang khnaui tong phuru nwng sa kha, tei nini kókrokni khorangrokno khna kha.

⁹Nwng sa-o, ‘Ang khe sap-sutra, mungsa hamya kwrwi; ang katswi srai-srai ani sumsok kwrwi.

¹⁰Nai di, bo ani cha yano nuk kha, tei abo ano bini kebengnai ari hai khe nugo;

¹¹bo ani yakungno dwkhwi bai kha-o tei ani yapri matheno naichomo.’

¹²“Tamo khe oro le nini cha ya wng laha. Ang nono ma sa-o: Kaitor khe thwiblang borokni slái kotor.

¹³Hakhe nwng ano majra berwi, ‘Bo ani samarok thái sa phano khna glak’ hwnwi ma sa?

¹⁴Tamni hwn ba Kaitor uái-re uái sa phano bororok abono mungsa romwi man ya.

¹⁵Imang tẃi, horo thuyamo muktrwi thángwi thu-ui tong phuru imang-mukthang khe

¹⁶hakhe bo bórokni khunjurok phiyógwi rw-o, tei sikiriui hus khlai rw-o,

¹⁷abo bai bórok samung hamya tangmarokni kiphilnai, tei kung chukmano khibinai,

¹⁸bórokni pholano hakhoro ma klainani yakni kati rw-o, tei seng bai butharjaknani yakni kati-o.

¹⁹“Bórok thuyamrogo swpragwi khorai jago, tei bekrengrok sakrup rwjak máng tongo,

²⁰hakhe bórok ok khuijak ya wngo tei chámung kothokrok nuk phano se ok khuijak ya.

²¹Bini sakrok pái súk kha, nukna se tuk si-o; tei bórokni bekrengrok salsa sijak ya tongmani, tabuk khe abo khungrang-grang khe se nukjak si-o.

²²Bórokni rangma mangkhor bwkhak sederwi tong kha, tei bini langma kwthwirokni ha-o sógwina naiwi tong kha.

²³Tumung bini bagwi suari khoroksa manju-ui rwnaisa tei sa-sairokni bisingo khoroksa borokni bagwi bubo chajak sanai tong khe,

²⁴bo bórokno khairogwi, ‘Bono a hakhoro ma klainani yakni phiyók di; bono phiyóknani bagwi rwna tongmani ang man kha;

²⁵bini bahanrok chwrairokni hai hamchaui phainai; bo sikla phuruni phanrokno kiphilwi mannai;’

²⁶hakhe bo Kaitorno suri khe bo yachakjaknai, bo bwkha tongthogwi bini thani phai-o, tei Kaitor bono bini kahamni manthaino rwnai.

²⁷A borok buino ahai hwnwi rwchabwi sanai ‘Ang sumsok khlai kha tei kubuino dera rw kha, tei ang aboni bagwi ang sujak phi li ya.

²⁸Bo ano hakhoro ma thángnani yakni phiyók kha, tei ani langma pohorno nuknai.’

²⁹“Nai di, Kaitor se omorok bebakno khlai-o, uáinwi, uáitham bororokno abo hai khlai-o,

³⁰abo khe bono hakhorni kiphil rwna bagwi tei langmani pohorno phunukna bagwi khlai-o.

³¹Khna di, Job, ani kókno khunju kai di; siring siring wng di, ang kók sa anw.

³²Nini mungsa swk sajaknai tong khe, ano uphilwi sa di; sa di, ang nono srai-srai khlaina muchungo.

³³Tumungno ahai ya khe ani kókno khna di; siring siring wng di, ang nono simung phrwngnai.”