Read Kok Borok JOB 34 Bible Online

JOB 34 - Kok Borok bible

JOB 34

¹Hakhe Elihu hai hwnwi sa kha:

²“Si kwrwngrok ani kókrokno khna di, sinairok ani kókrokno khna bái ja di o sijakrok;

³tamni hwn ba khunju khe kókrokno chánai-o tei bwslai khe kothokno chánai-o.

⁴Phai di sói kahamno sai lai anw; chini bisingo tamo kaham tong chong lai si anw.

⁵Job sa kha, ‘Ang srai-srai majra kwrwi, Kaitor ani manthaino segwi na kha;

⁶ang sói wng phano ang tatal hwnwi romjak kha; ani kwsarok ham glak kha, aile ani sumsok se kwrwi.’

⁷Job hai borok sabo tong? Bo sejamano suda twi nung tẃi nung kha,

⁸samung hamya tangnairok bai thansa tongnai tei borok hamyarok bai himnai sabo tong?

⁹Tamni hwn ba bo ahai hwnwi sa-o, ‘Kaitor nai tẃi tongwi mungsa manna kwrwi.’

¹⁰“Aboni bagwino sinai bororok ang samano khna di, Kaitor cha ya khlai ya, Kwplaisa hamya khlai ya.

¹¹Bórok samung tangma tẃi se bo bórokni sokat rw-o, bórokni tongmung tẃi se bórokno manjak rw-o.

¹²Kaitor samung hamya ta se tang ya, Kwplaisa bo buj cha yabo khlai ya.

¹³Bono sabo o harokni barja rw kha tei sabo bono o swngcharni barja yaphar kha?

¹⁴Tumung bo sakni pholano kiphilwi na khe, bini hamano thumwi na phi khe,

¹⁵bebak bahan bwthẃi gwnangrok uáisa bai komornai, tei thwiblangrok hadlwi ma cha phinai.

¹⁶“Tumung nini bujimung tong khe ani kókno khunju kai di; ang samano khna di.

¹⁷Bujsóino naislernai naikolnai de wngwi manno? khoroksa phan gwnang tei bujsói khlainaino nwng hamya da hwnno,

¹⁸sabo habugrano, ‘Nwng samungo chúk ya!’ tei tẃiphangrokno, ‘Nwng borok hamya!’ hwnnai?

¹⁹Bo borok kotorrokni mwkhang torjak ya tei gwnangroknobo bigrarokni slái nai kuk ya, bórok bebakno bini yak bai snamma ya diba?

²⁰Srapsa kheno bórok thwi-o; hor diboro bororok kwlwibra-o tei lái thángo, borok bai yak kosonjak yaui’-no phankrakrok norwi tlang jago.

²¹“Tamni hwn khe bororokni saka-o bo naikhlaijak, bo bórokni yaprirokno nugo.

²²Samung hamya khlainairok huijakna bagwi mungsa mwnaksese eba mwnak kuthuk kwrwi.

²³Tamni hwn ba bini chongjak jorano karwi khoroksa phano Kaitorni aro bujni bagwi thángwi man ya.

²⁴Bo phan gwnangrokno naichom yaui’-no noro phiya tei kubunrokno bórokni aro achuk rw-o.

²⁵Omo hai khe, bórokni samungrok siui horni bisingono bórokno norwi sokomorwi pái-o.

²⁶Bo bórokni samung hamyarokni bagwi pháng-pháng kheno bórokno swprago,

²⁷tamni hwn ba bórok bini lamani phér kha, tei bini raidarokno sak nang lai li ya gwja.

²⁸Abo tẃi khe bórok bigrarokno kap rw-o tei bini thani phai rw-o, tei bo birmano klaijakrokni kapma khorangno khna-o.

²⁹Bo siring siring tong phuru, sabo hamya saui mannai? Dopha phano wng thung eba sak saichung phano wng thung, bo nukjak ya khe tong khe sabo bono nuknai?

³⁰Hakhe Kaitorno kiriyarok eba borokno sátoknairok tẃiphang wngwi man glak.

³¹“Kaitorno khoroksa swk ahai hwnwi sa de sa kha, ‘Ang khoraijak kha; ang tei kebeng li ya;

³²ang nuk yano ano phrwng di; tumung ang cha ya khlaima tong khe ang abo hai tei khlai phi glak.’

³³Nwng kók khna ya hwnwi bo nono nwng chong tẃi de nini manthaino rwnai? Tamni hwn ba nwng se chongnai ang ya; aboni bagwi nwng simarokno sa di.

³⁴Sinairok ano sa anw, ani kók khnanai siyan tẃinairok sa anw,

³⁵‘Job si yaui se sa-o, bini kógo mungsa srwngjaknai kwrwi.’

³⁶Job katswi amjoksugwi naijak thung hwnwi ang muchungo, tamni hwn ba bo borok hamyarok hai khe kók uphilwi sa kha.

³⁷Tamni hwn khe bo kók na ya wngwi sumsok khlai kha; bo chini bwskango yapha khorop kha tei Kaitorno kebengwi kók kwbángma sa kha.”