Read Kok Borok JOB 35 Bible Online

JOB 35 - Kok Borok bible

JOB 35

¹Hakhe Elihu hai hwnwi sa kha:

²“Omono cha-o hwnwi da nwng uansuk? ‘Kaitorni thani ang srai-srai hwnwi uansugo.’

³‘Ang tamo man kha ba? Sumsok khlai yaui tongwi ang ani tamo le ham kha?’

⁴Ang nikichingsongno tei nono uphilwi sanai.

⁵Nokharokno tei twijlangno naisigwi nai di; nini slái kuchuk chumuirokno naiwi nai di.

⁶Nwng sumsok khlai khe, abo bini ba tamo kebengjaknai? Tei tumung nini sumsok bángsa khe abo bini ba tamo?

⁷Nwng borok sói wngma bai, nwng Kaitorno tamo rwma klai; eba bo nini yakni tamo manma klainai?

⁸Nini samung hamyarok khe nwng hai borokno simi dera rw-o, tei nini samung kaham khe buino phan rw-o.

⁹“Tamni hwn ba sátokjakma báng khe bororok chirik lai-o; bórok khoroksa swk phan gwnangni yakni yókna bagwi chirik lai-o.

¹⁰Tamo khe khoroksa phano ‘Ano snamnaisa Kaitor buro, horo phan rwnaisa buro,

¹¹chwngno ha sakani mal-matarokni slái phrwng kugo, tei nokhani tokrokni slái siyan gwnang khlai ya diba?’

¹²Bórok chirik lai-o, tamo khe bo khna ya, abo bórok kung chuk chukma bagwi se.

¹³Kaitor haino kapmano khna glak, tei Kwplaisa abono sak nangjak glak.

¹⁴Tamo wngwi tongma bo nuk ya hwnwi sa khe abo teibo cha ya, buj le bini bwskango se tei nwng bono naisigwi tongo!

¹⁵Tabuk khe nwng bo joliui majra berwi yagul su ya hwnwi nwng bono kebengwi chirik kha,

¹⁶Job haino kók nang yarok se sa-o, bo si yaui se kókrokno báng rw-o.”