Read Kok Borok JOB 36 Bible Online

JOB 36 - Kok Borok bible

JOB 36

¹Elihu hai hwnwi sa phi kha,

²“Kisa bwkha lok gra di, ang nono ani kók samarok abo kubui hwnwi phunuknai, Kaitorni wngwi ani sajaknairok tong kho.

³Ang hakchalmani simungno tikhlaiwi saui ani snamnaisano sói hwnwi phunuknai.

⁴Ani kókrok tatal ya kubui se; khoroksa srai-srai khe sinai borok bo nwng bai’-no tongo.

⁵“Nai di Kaitor le phan gwnang se, phiya bo khoroksanobo khibi ya; bo phan tei simung gwnang.

⁶Bo borok hamyarokno kwthang ton ya tamo khe sátokjakrokni manthaino rw-o.

⁷Borok sóirokno bo naikhlai máng tongo, tei habugrarok bai baksa khe bórokno kuchuk khlaiwi achukthayungo ton phlai-o.

⁸Tumung bórok sátokmungni sordukrok bai khajak khe,

⁹hakhe bo bórokni samungrokno tei samung hamyarokno sakhlai-o, aboni bagwi bórok kung chuk lai-o.

¹⁰Bo bórokno phrwngna bagwi khunju kai rw-o, tei samung hamyani kiphilna bagwi dagi-o.

¹¹Tumung bórok bini kók khna khe tei bono mon khe bórok kwthang tong sak hamari mannai tei khakchangwi tongnai.

¹²Bórok khna ya hwn khe seng bai sokomorjaknai tei si yaui’-no thwi báinai.

¹³“Kaitorno kiriyarok bwkha-o jolima tẃi-o; sátokjakphano bórok chubachu sanwi kap ya.

¹⁴Bórok chwrai umoro’-no thwi-o, bórokni langma baliknairok bai baksa pái-o.

¹⁵Phiya ba bo bórokno sátokma manjak rwui aroni phiyógo tei digi-sigi man rwui khunju kiyok rw-o.

¹⁶Bo nono tong khochorni phiyógwi kirimung kwrwi kwchang kwchango khebo tono, hakhe nini khalai-o chámung kupulung khe rw-o.

¹⁷“Phiya ba nwng borok hamya wngmani bagwi buj thumjaknani poja horjak, buj bai sói majra nono rom kha.

¹⁸Hus wng di, jolimungrok bai nwng lama koró rwjaknai se tei rang gwnang wngna muchungma nono lama phér rwui tlangnai se.

¹⁹Nwng kapma bai digi-sigini de yókno, eba nini bebak phanrok chubanai diba?

²⁰Horo bororok bórokni tongthaini pái rwui páijago hwnwi abono ta khátang di.

²¹Hus wng di! Sumsogo ta kiphil phi di; aboni bagwi se nwng sátokmung ma manjago.

²²Nai di, Kaitor bini phan bai se lobjago, bo hai phrwngnai sabo tong?

²³Bono sabo tamo khlainani sanai, eba ‘Nwng cha ya khlai kha’ hwnwi saui mannai?

²⁴“Bini samungrokni bagwi bororok bono lobsamano muitu narwk di.

²⁵Bebak bororok abono naisik kha; joto bororok abono hakchalo tong tw tẃi naisik kha.

²⁶Kaitor le Kotor se tei chwng bono sini ya; bo nokha bisi bwswk wngjak abo kebo lekhaui man ya.

²⁷Bo twirokno nokha-o tisa-o; tei abono bo uatwi snamwi ua rw-o,

²⁸abono nokhani klai rw-o, bororokni thani abo kwbáng khe bwthái-bwthái khe ua-o.

²⁹Chumuirok bahai khe pisarjak khoroksabo saui de man tei bahai khe bini aroni phirangrok kokjak saui de man?

³⁰Bo abono kitingwi bahai khe nokha philiksa rw nai di, tei abo twijlang kuthuk jora bahai khe jiliksa rw nai di.

³¹Omo hai kheno bo lukurokni buj thumo; tei bororokno ok pung rwui chámung rw-o.

³²Bo bini yakno nokha philikma bai khobo tei chongjak mari-o swprakna bagwi dagi-o.

³³A phirang bini kókno sakhlai-o; bo sumsoknobo músú-ui jolijago.