Read Kok Borok JOB 37 Bible Online

JOB 37 - Kok Borok bible

JOB 37

¹“Omoni bagwi ani bwkha kwlwi-o, tei belai khe bwkha mai súgo.

²Khna di, Kaitorni khorang khna bái di tei bini búkhúkni nongkhorma phirangni khorangno khna di.

³Nokha gwnangwi’-no bo abono rohoro tei bini nokha philikma hani bebak babai-o sógwi-o.

⁴Aboni ulo khe bini khorang gurumgsa-o; bo bini khorang kwplai bai phirang kogo tei bini a khorang khna rw phuru khe nokha philik rw ya.

⁵Kaitor kwmamsingcha khe bini khorang bai phirang kogo; bo samung kotor khlaimano chwng saui rwi man ya.

⁶Bo kothor kwsaprokno, ‘Ha saka-o klai di;’ tei uatwi bodolrokno khe uatwi uanani bagwi dagi-o,

⁷hakhe bo snammani manwirok si thung hwnwi bo bororokni yago mari bu-o.

⁸Hakhe bolongni malrok bórokni tongthai-o thángo tei hakhoro tongwi lai-o.

⁹Nokbar kotor bini tongthaini phai-o tei pisa-piring nokbarni kwchangma nokbar phai-o.

¹⁰Kaitorni hama bai kothor cha-o tei abo bai twirok doui kothor chaui bwthap cha-o.

¹¹Bo chumui rwjajakno misi sa-o; hakhe chumui bisingrokni nokha philigo.

¹²Abo, bo bai lama phunukjakma tẃi yang uyang kitingo, bini dagimarok cha rwna bagwi ha gwnangwi abo kitingo.

¹³Cha rwna bagwi phano eba bini hani bagwi phano eba khe hamjakma bagwi phano, bo abono wng rw-o.

¹⁴“Job, nwng omono khna di bathagwi Kaitorni kwmamsingcha samungrokno uansugwi nai di.

¹⁵Kaitor bahai khe bórokno dagi nwng saui da man, tei nokha philikma bai tamoni chumui-o chẃng rw si de si?

¹⁶Chumui bahai khe kobonwi tong nwng si de si? Bini samungrok kwmamsingcha bo sói khe si súgo,

¹⁷ha saka tẃi salgrabaini nokbar sipsa ya khe norok rí chumwi tungphlajak ya da?

¹⁸Nwng bo hai khe nokhano gelejak aina hai khe phehelwi de manno?

¹⁹Chwng bono tamo sanai phrwng di; mwnakni bagwi chwng chini kókno saui man ya.

²⁰Ang kók sa anw hwnwi bono sa de sajakno? Khoroksa swk kholopjagwi páijakna de muchungno?

²¹“Nokbar bai nokha srai-srai wngjago nokha-o belai pohor chẃngma bagwi naisigwi man ya.

²²Salsibai nokha-o kwchak wngwi phai-o; Kaitorno kirimasingcha kitingjak.

²³Kwplaisani phanno chwng uansugwi man ya; bo phankrak tei bujsói tẃi-o, bo bujsói khibi glak.

²⁴Aboni bagwi bororok bono kiri-o; bwkha-o sijak hwnwi chongnairokno bo sak nang ya.”