Read Kok Borok JOB 38 Bible Online

JOB 38 - Kok Borok bible

JOB 38

¹Hakhe Subraiyung bangkundrini bising tẃi khe Jobno sa kha:

²“Simung kwrwi twtwi khe ani simungno tẃi sabo sẃng?

³Chwla hai khe chango rí khaui bacha di, ang nono sẃng anw, tei nwng khe abono uphilwi sa di.

⁴“Ang o hano snamna cheng phuru nwng buro tongmani? Nwng saui man khe ano sa di.

⁵Sabo omono su-ui chong khna! Eba sabo ba su-ui ari mari rik khna nwng saui da man?

⁶Bu thongla bai se abo songchajagwi tong eba aboni noksuni thonglano sabo kái kha?

⁷Buphuru aitorma athukirirok baksa khe rwchap lai tei chuknohani Kaitorni bwsarok tongthogwi chirik lai?

⁸“Twi oksingni kokphloui phaisa phuru sabo twijlangni duglamrokno soui rw?

⁹Chumuirok bai twijlangni kanmung-chummung snam phuru tei mwnakma bai abono kholobwi ton phuru,

¹⁰aboni duglamrokno berebwi tonwi aboni ari boui khaui narwk phuru,

¹¹ang abono ‘Aswk jorano phai di, tei ta lái di, nini phankrak twi aphal orono ma thaknai hwnwi sa ya da?’

¹²“Nwng aiwi sal chengnani da de dagi kha, tei salno buro pasanai sa da sa kha,

¹³nwng sal pohorno segwi swngcharni borok hamyarok jangrijak thung hwnwi da de dagi kha?

¹⁴Abo harpego mari bujak tẃi khe sláijago, tei abo rí hai khe gap phuljago.

¹⁵Pohor khe borok hamyarokni samungno kebengo, tei bórokni yak harjakno swbai rw-o.

¹⁶“Nwng twijlangni twimugo ha de hap kha, eba twi kuthukni ha-o hi de him kha?

¹⁷Thwimungni duglamno nwng phu de phunukjak kha eba mwnak kuthukni duglamno nwng nu de nuk kha?

¹⁸O ha bwswk se uar nwng saui de man? Nwng omorokno si khe sakhlai di.

¹⁹“Nwng pohorni tongthai buro si de si tei mwnak ba buroni saui de man,

²⁰nwng abono bini tongthai-o tlangwi de manno, tei bini nok lamano saui de man?

²¹Ao, nwng si-o tamni hwn ba nwng aphuru se achai-o tei nini umorbo kwbángma wng kha.

²²“Nwng kothor kwsapni rwbamo de hap kha, eba kothor rúngma nok de nuk kha,

²³abórokno ang digi-sigi salni bagwi, choba tei ur patima salni bagwi khatiui ton ya diba?

²⁴Pohor kopromani lama abo biyang tẃi eba salkabaini nokbar ha saka-o buro pisarjagwi tháng?

²⁵“Uatwi klaina bagwi sabo twilam khur tei phirangni bagwi lama snam,

²⁶khoroksabo kwrwi hapharo, hasinglwngo borokni tongthai yarogo uatwi ua rwna bagwi,

²⁷ha ransajakno twi kochom rwna bagwi, tei abo ba ha saka-o jabra achai rwna bagwi ya diba?

²⁸“Uatwini bupha de tong? Pantwi khe buroni phai?

²⁹Saboni oksingni kothor achai nokhani kothor kwsaproknoba saboni okni?

³⁰Twi se holong hai khe ragwi thángo, tei twijlang kuthukni twibo kothor kha-o.

³¹“Nwng takhuksni athukirirokno khaui da manno, eba athukiri polbangno khengwi da man?

³²Nwng molni swkango athukiri bodolno bini tongthai-o tubu-ui da manno, eba athukiri takhuksnirokno lama de phunugui manno?

³³Nwng nokharokni raidarokno si de si? Nwng ha saka-o bórokni raidano phnangwi da mano?

³⁴“Nokhani uatwirok nini saka-o kobol phaina tẃi khe nini khorangno chumui jora de sógwi rwui manno?

³⁵Nwng phirangrokno rohorwi da manno, hakhe bórokno ‘Chwng oro se’ hwnwi de sano?

³⁶Sabo bwkha bisingo simung rw kha, eba bwkhano si rw kha?

³⁷Sabo simung bai chumuino lekhaui mannai? Eba sabo nokharokni chumui budulno philwi mannai?

³⁸Buphuru hasingsarok swrap laiwi raksaui man tei ha bwlaprok thansa khe swrap?

³⁹“Nwng singhoni banta mui romwi da man, eba singho bwsarokni ok kwchang rwui da manno?

⁴⁰Bórok buphuru hagurungo thu-ui tong phuru eba huijagwi muirok romna naichom?

⁴¹Sabo tokhano chámung man rwi rw, Kaitorni thani bwsarok chirik lai phuru khe tei chámung biyal wngwi naituk lai phuru khe sabo bórokno rwui ton?