Read Kok Borok JOB 39 Bible Online

JOB 39 - Kok Borok bible

JOB 39

¹“Hachukni korua buphuru achai nwng saui de man? Nwng mwswirok bámani nu de nuk kha?

²Bórok nokha tal bwswk ogo bwsa tẃi tei buphuru bórokni bánani jora wng nwng saui de man?

³Buphuru bórok bwsa banani kongson bórokni bwsa kwlwino o swngcharo tubu lai?

⁴Bórokni bwsarok sak ragwi phai-o, bórok yókjak kheno toro tei bórok nongkhorwi thángwi bórokni aro kiphilwi phai phiya.

⁵“Bolongni korai chirkano sabo phiyógwi rw? Sabo kherbai rwjak korai chirkarokno khengwi rw,

⁶hasinglwngo ang bórokno nok rw ya diba, tei sóm gwnang hano bini tongthai khlai rw ya diba?

⁷Bórok kamiyungni keche-kecheno chajak ya tei béngnaini chirikma khorangno bórok khnana nang ya.

⁸Hachukrogo se bini ada chájaknai haphar, bo jabra kwkhrangrok naitugwi thángo.

⁹“Bolongni musuk nono monna de nai ba? Bo nini musuk nogo horo to de tongno?

¹⁰Nwng bono buduk bai khaui de manno eba khaui bo nini hapharo al de chuai manno?

¹¹Phan gwnang hwnwi nwng bono bwkha beda berano tei nini samungrokno khlaina barja bono rwui de manno?

¹²Bo kiphilwi nini mairokno tubu-ui nakthani rúngwi rw phai anw hwnwi da nwng poito khlai tong?

¹³“Tokmangingang kangkhung bupra-o tamo khe bórokni a bwkrangrok saruksa bwkrang bai se suna kwrwi.

¹⁴Bo ha-o bẃtẃi tẃi klangwi thángo tei ha bai abo kutung khe koró jago,

¹⁵khoroksa swk de abono kachrebwi swbaino tei bolongni mal-matarok de kádulno abono bwkha-o ka ya.

¹⁶Bo bwsarokno buini bwsa hai khe khairokma kwrwi khe sátogo; bo bini samung ma khlaimarok chúk ya wngjaknarokno uansuk ya;

¹⁷Kaitor bono simungno pok rw kha tei rwngmungbo rw li ya.

¹⁸Bo khárna bachasa khe korai bai a korai kanaino mwnwi-o.

¹⁹“Nwng de koraino phan rw ba? Bini gwdna-o nwng de buikhumu kolok bacha rw?

²⁰Nwng de bono kuk bahar tẃi khe bahar rw ba tei bini chirikma bai borokno sikiri-o.

²¹Bo phan gwnang khe yakung bai káchigwi tongthokjago, tei bini choba-o nang lainani do lango.

²²Kirimano bo sak nangjak ya, kirijak ya; bo chobani uphilwi khár ya.

²³Bini chakhla bokhok saka-o, jilikjak olonga tei koslurok srao-srao khe nang phai-o.

²⁴Thamchi kaui tungphlajagwi uamwcharwi doui swkangwi thángo; totroni khorang khna khe tei thóng-thóng khe bachaui tongwi man ya.

²⁵Totro pungma khna khe bo sa-o, ‘Do di!’ hakchalo chobani báhai mano, tei sengkrak bokhorokni chirigwi dagima khorangno khna-o.

²⁶“Nwng de kuchugo birnai tolingno birna phrwng ba, tei bwkrang phehelsaui salgrabai-o birsa rw ba?

²⁷Nwng dagima bai de toling kuchugo bir tei kuchugo bothop thum ba?

²⁸Bo holongo bothop snamo, holong gudrak-mudrago bothop snamo.

²⁹Aro tongtw tẃi bini mui naichomo; bini mokol bai hakchalo tong twtwi nuhuro.

³⁰Bini bwsa kwlwirok thẃi nungo; aro bórok kwthwirokno chá-o.”