Read Kok Borok JOB 4 Bible Online

JOB 4 - Kok Borok bible

JOB 4

¹Aphuru khe Timnani Eliphas hai hwnwi sa kha:

²“Tumung khoroksa swk nwng bai kók sa khe nwng chajak ya de wngjakno? Phiya sabo se kók sa yaui tongwi mannai?

³Nai di, nwng borok kwbángmano’-no phrwng kha, kwbángma yak kebelrokno yak rak rw kha.

⁴Thutainairok nini kókrok bai chubachu man kha; tei yáskú kebelrokbo rak rwmung man kha.

⁵Tamo khe tabuk jora sók phai laha, nwng soiwibo man li ya; abo nono nang rw kha, tei nwng bwkha báijak kha.

⁶Nwng Kaitorno kiriui bwkha buthar súgwi abo baino bwkha ragwi tei khatungwi tongma ya diba?”

⁷“Tabuk uansugwi nai di, borok kahamrok uáisa phano koda komor ba? Eba borok sóirok buphuru khibijak kha ba?

⁸Ang nuk kha, hamyano chuainairok le urumuruni bwchlwino se saro, tei jwngjalni bwtháino se ma ra-o.

⁹Kaitorni hama bai bórok komoro, tei bini jolima bai bórok komoro.

¹⁰Borok hamyarok singhorok hai khe sokromo, tamo khe Kaitor bórokni buano swbai-o.

¹¹Phan gwnang singho mui romwi ma chá ya khe komoro, tei bórokni bwsarok oroi-poroi wngo.”

¹²“Tabuk ani thani sereksa khe kók tháisa sók phai kha, ani khunju-o abo nang phaidrop wng kha.

¹³Abo bororok muktrwi tháng súgwi thujago imang nukma hai,

¹⁴ang kirima chá kha tei kwlwibraui ani bekrengrok se ninang si-o.

¹⁵Ani mwkhango nokbar kwchang sibchaui nangwi tháng phai kha; kiriui ani bwsak buikhumu bacha kha.

¹⁶Abo bathagwi tong kha, tamo khe abo bubo hai ang saui man li ya. Ang mangtang kaisa nuk kha; tei siring-sorop wng khe ang khorang kaisa khna kha:

¹⁷‘Thwiblang borok Kaitorni thani borok sói da wngwi man? Bini snamnaisani bwskango borok katswi srai-srai da wng súgwi manno?

¹⁸Bini selengrokno suda bo bwkha bera ya, tei bo bini suariroknobo cha ya khe majra bero;

¹⁹hani snamjak nogo tongnairokno bo bwswk poito khlainai, aboni yaphang le hadlwi se, abo yóngdul hai se kepeknai.

²⁰Sal kasaui sal hapmani kwcharo bórok komornai; muitu khujak yaui bórok komor phlai thángo.

²¹Bórokni rínokni khatonjaknai budukno bórokni aroni sachujaknai, bórok simung si yaui thwi-o.’ ”