Read Kok Borok JOB 40 Bible Online

JOB 40 - Kok Borok bible

JOB 40

¹Subraiyung Jobno hai hwnwi sa kha;

²“Cha ya naituknai borok Kwplaisa bai bwkha de kochomjak ba? Kaitor bai kók swbángnai borok bo sakno abo sa phi thung.”

³Hakhe Job Subraino uphilwi hai hwnwi sa kha:

⁴“Nai di ang le biphiring hai se; ang nono tamo uphilwi sanai? Ang ani búkhúkno yak bai muthubo.

⁵Ang uáisa bai’-no sa kha; ang tei sa phi li ya; ang tei sa phi glak.”

⁶Hakhe Subraiyung bangkundrini bising tẃi khe Jobno sa kha:

⁷“Chwla hai khe chango rí kha di; ang nono sẃngnai tei nwng abono uphilwi sa di.

⁸Nwng ano cha ya de snamnai kho? Nwng sakno kaham hwnwi phunukna bagwi ano hamya hwnnai hai de?

⁹Nwng Kaitor swk de rak ba tei bini phirangni khorang swk de nini khorang tor ba?

¹⁰“Haino hwn khe sakno bórom tei kung chukma bai bacha di; phan bai chẃngsachano sakno kan rw di.

¹¹Nini jolima bauaijakno lukhlaiwi khibi di, kung chuknairokno tei bono hamya sanairokno naisik di tei bórokno mukhrup di.

¹²Bebak kung chuknairokno naisik di tei bórokno hachero tikhlai di; borok hamyarokno, bórok bachaui tongma’-ono sukhrup di.

¹³Bórok bebaknono ha-o phob di; tei kwthwirokni ha-o bórokno khaui ton di.

¹⁴Hakhe ang nini yagra yak nono kwplai khlaiwi mano hwnwi ang nono lobnai.

¹⁵“Twini Behemotno nai di, ang abonobo nono snam tẃi’-no snam kha; bo musuk hai khe jabra chá-o.

¹⁶Bini bwchango phan tongo tei bini bohok tolani bahano phankrakma tongo.

¹⁷Bo bini khitungno sidar phang hai theng theng khlai-o; tei bini yaphatwkni sirdukrok kwrak khe rap laijak.

¹⁸Bini bekrengrok pitol hai kwrak tei yathekrok khe sorkong hai.

¹⁹“Omo se Kaitor snammarokni puila phunukmari, bini Snamnaisa simi se bono sokomorwi mano.

²⁰Bolongni bebak yabrwirok thwng laithani hachukrok bórokni chámungno rw-o.

²¹Bo podo-phangrokni yaphango se thu-o, tei jalaini terenda bwlwngo khe huijagwi tongo.

²²Twi rukungni kaichra tong thani podo-phangrok bórokno saklom rw-o.

²³Twimani twi tur khe kochok khlai phano bo kirijak ya; Jordanni twi bini mwkhango bujak phai phano bo ámang-chímang wng ya.

²⁴Bono khoroksa phano bosoi biching bai romwi da manno eba khẃi thonwi romwi bono bukung da phugwi manno?