Read Kok Borok JOB 41 Bible Online

JOB 41 - Kok Borok bible

JOB 41

¹“Nwng á romma bosoi bai Lebiathonno romwi de manno eba bini chenglaino buduk bai khaui da manno?

²Nwng bini bukungo buduk bai khatonwi da manno, eba bosoi biching bai búkhúk suplaui de manno?

³Bo nono koimungrok da koino? Nono kók kwchang khe de sano?

⁴Kwthang tong sak ano nini seleng khlai di hwnwi bo nwng bai kók de kha laino?

⁵Nwng toksa bai tong tẃi khe abo bai to de tongno, eba nwsajwk chwraino abo bai mw de mwthwngno?

⁶Manwi painairok abono bwswk khe phalnai hwnwi sw de sẃng laino? Phalnairok abono banta khlaina de nai laino?

⁷Bini búkhúkno nwng sor kwplá bai swplaiui de manno eba khe á romma jatha bai de bokhorok swplaiui manno?

⁸Nwng bono romna nai khe bo bai ma nang laimano nwng tei pok glak; hakhe nwng tei romna nai phi glak!

⁹“Bono romnani bebak khatungmarok páinai; mwtairok suda bono nugwi ma sundrujago

¹⁰Bo kirimasingcha wngmani bagwi khoroksa phano bono socha rak ya. Hakhe ani bwskango le sabo bacha raknai?

¹¹Sabo ano dadak-didik khe mwkhang tisaui yógwi tongwi mannai? O nokhani tola-o sabo se tong?

¹²“Ang bini yathekrokni, bini phanrokni kókno tei bwsakni kókno tẃi sa yaui tongwi man glak.

¹³Sabo bini sakani chumjakno khugwi mannai? Sabo jing chapnwi phánwi bini bwkhak sederwi thángwi mannai?

¹⁴Sabo bini búkhúkno khua rwraknai? Bini buarok kirimasingcha.

¹⁵Bini phikung phuirok bai bwtang khe boui snamjak hai, chwrap khe phui bai thepaui snamjak hai.

¹⁶Kaisa bai tei kaisa aswk khe thepajak kwchar tẃi nokbar se habwi man ya.

¹⁷Abo kaisa bai tei kaisa swrapjak; kaisa tei kaisa nang laijakni bagwi abo swkagwi man ya.

¹⁸Bo haichuk khe jilik jalak se chẃngo, bini mokolrok sal pasadropni pohor hai.

¹⁹Bini búkhúkni hórjlai ongkhoro tei hoprengrok se kobonwi phaisa-o.

²⁰Jabra khamjago twkni twi kutukjakni hoku ongkhorma hai khe bini búkhúkni hoku ongkhoro.

²¹Bini hama nama bai hangar hór chẃngo tei bini búkhúkni khe hórjlai phai-o.

²²Bini gwdna-o aswk khe phan tongo, kirimung se bini bwskango ma kwlwibra-o.

²³Bini bahanrok kwrak khe kwphajak; abo kwrakma se lórjak ya.

²⁴Bini bwkha holong hai kwrak, lamani holongthai hai se kwrakma.

²⁵Bo bacha sa khe mwtairok suda ma kirijago; bórok kirijagwi uslu-ui ma thángo.

²⁶Bono seng bai tan phano mungsa chúk ya, sorni koslurok chakhlarok olongarok bono mungsa khlai man ya.

²⁷Sor khe bini thani chwkap hai se, tei pitol khe buphang kophon hai.

²⁸Chakhla bai bono khár rwui man ya; holong bai kokmabo gundak bai baksa se.

²⁹Raidangrok bini thani chwkap hai se, olongarokni khorang khnaui bo mwnwi-o.

³⁰Bini bohokni bophor sisi kwbai hai kubuk; bo hano harpek tẃi al chuai tẃi khe ha philwi thángo.

³¹Bo twijlangni twino suda twgo kutuk rwui twi ruk tẃi khe rugo; twijlangno thok kotra jangri tẃi khe jangri-o.

³²Bini uklogo bo chẃngsa rwui klango tei khoroksa swk abo bono nuk khe bwkhnai phursajak hwnwi chongo.

³³Ha saka-o bo hai mungsa kwrwi, bo mungsano bo kiri ya.

³⁴Bebak kung chuknai mal-matarokno sak nang ya; kung chuknairokni bisingo bo se kuchugo tongo.”