Read Kok Borok JOB 42 Bible Online

JOB 42 - Kok Borok bible

JOB 42

¹Hakhe Job Subraino uphilwi sa kha:

²“Nwng bebakno khlai mano, tei nwng uansuk tẃi khlaina naimano khoroksa phano kasu-ui man ya hwnwi ang si-o.

³‘Siya tw tẃi ani simungrokno sabo sẃngphnek?’ omo le ang se. Ang romwi man ya abo hairokno tẃi ang sajak kha, abórok ani thani kwmamsingcha.

⁴‘Khna di, ang sa anw; ang nono sẃngnai nwng khe ano sakhlai di.’

⁵Khunju bai nini kókno ang khna kha, tabuk khe mokol baithang ang nono nuk kha;

⁶aboni bagwi ang sakno ma lachi kha, hakhe hadlwi-o tei thapla bai khe bwkha kiphilo.”

⁷Subraiyung Jobno o kókrok saui pái khe bo Temansa Eliphasno hai hwnwi sa kha: “Ang nono tei nikichingsongrokno khencheneui joli kha; tamni hwn ba nwng tei nikichingsong ani seleng Job sa tẃi khe kók kubuino sa li ya.

⁸Aboni bagwi tabuk Jobni thani musuk chwla maksni tei mera maksni tlangwi norokni sak sakni bagwi sógwi barogwi di; ani seleng Job norokni bagwi surinai hakhe norok khlaijaknani yókna bagwi bini surimano khnanai; tamni hwn ba norok ani seleng Job ano sama hai khe norok sa li ya.”

⁹Hakhe Temansa Eliphas Suhitsa Bildad tei Namatsa Jophar Subraiyung bórokno khlai di hwnma tẃi khlai kha; tei Subraiyung Jobni surimano khna kha.

¹⁰Hakhe bikichingsongni bagwi suri khe Subraiyung Jobno haino hai hamcha rw phi kha tei bini swkango tongmani slái’-bo tei baknwi boksinwi rwjak kha.

¹¹Aphuru khe aro bini bebak takhuk bukhukrok tei swkango bono sininairok, hakhe bini nogo bo bai pal chá lainairok; bórok bono khairokjak kha tei Subraiyung bono digi-sigi-o khiklaimani bagwi bwkha kwchang rwnani kók sa lai kha; bórok bebakno bono rangrok tei rangchakni uakhumrok rw lai kha.

¹²Subraiyung Jobno swkango hamari rwmani slái ulo teibo hamari rw kha; bini chibrwisai mera, doksai mangingang, nwisai musuk chwlarok tei mak sasai korai chirkarok man kha.

¹³Bo sajla khoroksni tei sajwk khorokthamni buphabo wng kha.

¹⁴Bo bwsajwksong[11] okrano Jemima tei kwcharno Kejia tei kusuno khe Keren-hapuk hwnwi mung phar kha.

¹⁵O ha saka-o Jobni bwsajwksong hai tei khoroksabo bwrwi naithok kwrwi; tei bupha bórokni takhuksong bai baksano bórokno manthai banta khe rw kha.

¹⁶Aboni yagulo Job nokha bisi sa ra tei brwichi kwthang tong lang kha, hakhe bini sukrok bora rachirokno kusung brwi jora nuk lang kha.

¹⁷Hakhe Job umor chakra wng súgwi tong langwi thwi kha.