Read Kok Borok JOB 5 Bible Online

JOB 5 - Kok Borok bible

JOB 5

¹“Tabuk ring di; nwng ringmano khoroksa swk ya de yachakno? Bu kwtharsani aro nwng uphilnai?

²Kubui’-no, jolimung butuano butharo, tei músúmung khe borok sóino butharo.

³Ang butuano yarwng sukhlaima nuk kha, tamo khe achomsa ang bórokni nokno swrai kha.

⁴Bórokni bwsarok yókna lamani hakchal kha, bórok bórokni duglamo káduljak kha, tei bórokno phiyóknai khoroksa bo kwrwi kha.

⁵Ok khuijakrok bini mairokno chá kha, busulwngo klaijakno suda bórok tlango; tei bororok bini rang-mairoknobo khámai kha.

⁶Urumuru le ha sakani bacha ya, eba jora hamyarokbo ha sakani pepla sa ya;

⁷tamo khe bororok le jwngjalrokno hópreng rwcharsama hai khe birsa rwui tubu-o.

⁸“Ang khe Kaitorno naituk kha mun, tei ani jwngjalrokno Kaitorni thani yaphar kha mun.

⁹Bo samung kotor khlaimarokno chwng romwi man ya; tei bini uanamasingcha samungrokno lekha bái ya.

¹⁰Bo ha saka-o uatwi rw-o; tei auaro twi rohoro;

¹¹bo koinenerokno kuchugo tisa-o tei bwkha khamjakrokno khe bo phiyógwi katijago khe tlango.

¹²Bo hamya chapnai borokni chapmarokno sukrugwi rw-o, hakhe bórok samung cha rwui man ya wngo.

¹³Bo si kwrwng hwnjaknairokno khe bórokni simung bai’-no romo; tei bórokni hamya chapmungrokno dakti’-no sukrugwi khibi-o.

¹⁴Bórok sal kwthang kwthangobo mwnakjago, tei sajra jora-obo hor mwnak hai wngjagwi kopromwi ma himo.

¹⁵Bo kusupjakrokno khe phan-seng gwnangrokni yakni phiyógo tei kwplairokni yakni phiyógo.

¹⁶Hakhe kusupjakrok khatungma mano, tei buj tẃi yarok khúk muthupjago.

¹⁷“Nai di Kaitor bai khoraijaknairok bwswk se hamchajak; aboni bagwi Kwplaisani khoraimungno sak nang ya ta wngjak di.

¹⁸Tamni hwn ba bo se kwsa cha rw-o, phiya bo’-no khauibo rw phi-o; bo bu-o, bini a yak bai’-no habo ham rw-o.

¹⁹Bo nono mungdok birmanni yakni phiyóknai; hakhe mungsnini birmanrok phaiwi nono dera rwuibo man glak.

²⁰Asari nang phuru khe bo nono mwthangwi tonnai, tei chobani jora-o khe nono butharjaknani yakni phiyogwi tonnai.

²¹Nwng kók hamyani chemuksa bai swprakjaknani yakni yóknai, tei komormung phai phuru khe kirina nang glak.

²²Komormung tei asari phuru nwng uana yaui tongwi mannai tei nwng o ha sakani bolongni yabrwiroknobo kirina nang glak.

²³Nwng chuaima harok holongthai kwrwi wngnai, tei bolongni yabrwirokbo nono choprok glak.

²⁴Nwng nini tongma nogo kirima kwrwi khe tongwi mannai; nini merarokno mwrwgwi tong phuru abórok masa phano kwma glak.

²⁵Nwng nini bosongrok erma kókno nwng si nai, nini bwsarok hapharni jabra báng tẃi khe ernai

²⁶Mairok kormo súgwi rajakma hai, nwngbo rá súgwi ma tongnai, mai mun súk phuru kwrai tẃi nwngbo rá súgwi thwinai.

²⁷Nai di chwng omorokno cherwi nai kha; omo le kubuino. Khna di omo nini bagwibo abo haino wngnai.” khna di tei saui man di omo nini hamarini bagwi se.