Read Kok Borok JOB 6 Bible Online

JOB 6 - Kok Borok bible

JOB 6

¹Hakhe Job hai hwnwi sa kha,

²“Ani aswk bwkha nangmarokno lekhaui nai khe, tei ani birmanrokno rwtaui nai khe!

³Abórok twijlangni hasingni slái se hiliknai; aboni bagwi ani kókrok adlang-pidlang wng laha.

⁴Kwplaisani chakhlarok ani oro pajak, ani bwsago aboni bis kopro kha; Kaitorni sikirimarok ano kebengsa kha.

⁵Bolongni korai jabra ma chá khe eba musuk chwkap ma chá khe pu de pung ba?

⁶Thok ya chámungno sabo sóm nang ya khe chánai? Eba toktẃini bokhrino karwi a kuphur tho de thok ba?

⁷Ang abórokno chána muchung li ya; a chámungrok ano ongkhlai se cha rw si-o.

⁸“Ang manna muchungmano man ja thung, Kaitor ani naimano rw thung;

⁹Kaitor ano butharna muchung khe, yak phologwi ano pái khibi si thung!

¹⁰Abo hai khe ani bwkha se kwchang kha mun; tei ham phlai ya dunogwi samano man phano ang to se tongthok kha mun; tamni hwn ba ang Kwtharsani kókno nor li ya.

¹¹Ang tei bu phanno ba naisingwi tong sinai? tei tamono ba pái gra si thung hwnwi hama logwi tong sinai?

¹²Ani phan le holong hai da rak ba? Eba ani bwsakba tamo pitol da?

¹³Sakno mwthangna bagwi ani kisabo phan kwrwi kha, ani rwngmung simungrokbo kwmaui tháng kha.

¹⁴“Bikichingsongni khairokmungo bwkha beraui tongnairok Kwplaisano kiriui tongnano khibi-o.

¹⁵Tamo khe ani kichingsong le twi tur gwnang twisa hai phemloknai gwja se, abo twi rukung lomsa rwui kochok khlai thángo,

¹⁶abo kothor khaui somchaui tongo, aro gelenai kothor kwsaprok se huijak.

¹⁷Sal tungma bai abórok kwmaui thángo; tungsaui phai phuru khe abórok aroni kwmaui pái-o.

¹⁸Hasing tẃi himnairok aro uphilwi tháng khe; aro mungsa phano manẃi ya, bórok komorwi pái-o.

¹⁹Temani himnai bodolrok khe naitugo, Sebani himnairok khe khatung lai-o.

²⁰Bórok bwkha báijago, tamni hwn ba bórok bwkha beraui tongo; bórok aro phaiwi bwkha thwijak bai-o.

²¹Norokbo tabuk ani thani abo hai’-no; ani birman manjakmano nugwi kirijak bái kha.

²²‘Ano yaphar di, hwnwi de ang hwn?’ eba ‘Nini rang rírokno ani bagwi tuk di de hwn?’

²³Eba ‘Ano ani kebengnai arini yakni phiyók di de hwn?’ eba ‘Sátoknairokni yakni phiyógwi tubu di de hwn?’

²⁴“Ano phrwng di, hakhe ang siring siring khe tongnai; tei ang tamo cha yarokba khlai lang ano phunugui rw di.

²⁵Kók sóirogo bwswk se phan tong! Tamo khe nini kókrok le kók da wng si?

²⁶Norok ano norokni kók bai cha rwna thángo hai da, bwkha báijakni kókrok ba tamo kók nokbar diba?

²⁷Ma-pha kwrwi selengroknobo norok pat karwi nai lai-o tei norokni kichingrokno kusubwi gwnang kha lai-o.

²⁸“Tamo khe tabuk ano naisik di; ang norokno tatal sa glak.

²⁹Wng kha, norok aswk hamya sa laimarokno mwthak lai si di, ano mungsa hamya ta sa si di, ang tabukbo sóino tong kho.

³⁰Ani samarok cha ya de tong? Ang ba ani tekto manmarokno romwi man ya diba?