Read Kok Borok JOB 7 Bible Online

JOB 7 - Kok Borok bible

JOB 7

¹“Ha saka-o borok ba samung kwrak ma khlai ya da, tei bini salrokba munirokni hai ya da?

²Selengrok saklomo bathakna muchungjak tẃi tei munirok mula manna muchungjak tẃi,

³hakhe ang tal brúmno bukcha khe se tonjago, tei hor brúmno ani bwkha khamnani máng se.

⁴Horo ang thu khebo ‘Ang bu phuru bacha phinai?’ ma hwno, tei horbo belaino logo, ai ya sak ang ayang-uyang khátiui dundrogo.

⁵Ani sago yóngrok klai kha tei simuk khá súk kha; bukur bophor khaui haino hai kwsa cha-o.

⁶Ani sal thantini thuri hai se doui lái-o tei mungsa khatungma kwrwi kheno pái thángo.

⁷“Muitu narwk di, ani langma khe hama se; ang tei mokol bai tongthok nuk glak.

⁸Ano nuknairok tei nuk phi glak kha; nwng ano nugwi tong twtwi’-no ang páiwi thángnai.

⁹Chumui kobonwi tei kwmaui thángma hai, thwiwi thángwi mangkhor mwnago thángnairok le tei kiphil ya;

¹⁰bórok bórokni nokrogo tei kiphil glak, bono sininairokbo bono pok báinai.

¹¹“Abo baino ang kók sa yaui tong li ya; ang bwkha bai joliui kók sanai; ang bwkha nang súgwi tentaiwi sanai.

¹²“Ang ba tamo twijlang da eba twini chibuk kotor[6] da, ano mwrwk thung hwnwi ton?

¹³‘Ani thuyamo ang rokoui lenglaui mano, ani swndarwi achukjaknai maicha-o khe achugwi ani aswkni ma tentaimarokno poknai,’ hwnwi ang hwnwi sa phuru,

¹⁴aphuru khe nwng ano imangrok tẃi, tei imang-mukthang bai khe ano sikiri-sokoro khlai kha,

¹⁵hakhe ang ámang-chímang wngwi kwthang tongna hamjak yaui thwina ma muchung thung hwnwi se nwng nai si-o.

¹⁶Ani langmano ang naisler laha; ang kwthang tong phlai glak. Ang saichung kheno ma tong si thung, tamni hwnma le ani o langma le nokbar hai se.

¹⁷“Borok le tamo ba, nwng bono aswk torjak te lang; bono ba aswk khe nwng ba mokol ma kái te lang,

¹⁸phung aikheno nwng bono nai-o, tei bono naikini khlai máng tong?

¹⁹Muphliksani bagwi phano nwng ano naisik yaui tongwi man ya da, tamo ano khuktwi monoksa phano ano yakarwi rwna man ya da?

²⁰Tumung ang sumsok khlai khe, ang nono tamo khlainai, nwngno bororokno mwrwknaisa ya diba? Nwng ano simi ba tamo nuk lang? Ang ba tamo nini hilik hormung ba ma wng lang?

²¹Tamo nwng ani sumsokno nakar ya wng tei ani samung cha yarokno ruju ya wng? Tabuk khe ang ha-o se tháng sinai laha; nwng ano naituk phano ang tei tong glak kha.”