Read Kok Borok JOB 8 Bible Online

JOB 8 - Kok Borok bible

JOB 8

¹Hakhe Suhansa Bildad hai hwnwi sa kha:

²“Nwng tei bwswk o kókrokno sa sinai, tei nini khukni kókrok ba nokbar hai wng sinai.

³Kaitor bujsói khlai phuru ubrum jabrum khe da khlai? Eba sói khe khlainano kwchaui da tong ba?

⁴Nwsarok Kaitorni thani sumsok khlai khe, bo bórokno a majrani manthaino rw-o.

⁵Tumung nwng Kaitorno naituk khe tei kwplaisano koi khe,

⁶tumung nwng kubui kwthar khe tong khe, kubui’-no bo nini bagwi bachaui nono nini sói manthaino rw kha mun.

⁷Nini chengdrobo tortha ya phano ulni salrogo belai kotor wngnai.

⁸“Nini chuchusongno sẃngwi nai di, tei bórok bórokni chuchusongrokni tamono srwng kha naiwi nai di.

⁹Chini langma le belaino bara, chwng mungsabo si ya, o ha saka-o chini salrok sampili hai se.

¹⁰Bórok nono bórokni simano tẃi nono sa glak da, phrwng glak da?

¹¹“Ha kisi ya khe Papira achaiwi da man ba? Twi kwrwi khe twini sam loksaui da man ba?

¹²Bubar barwi tongma jora-o raui narwk ya khe, tei kubun jabrarokni slái swkang se abo mwranwi thángo.

¹³Kaitorno poknairokbo abo haino; Kaitorno kiri yarokni khatungmabo páinai.

¹⁴Bórok béngsnal hai-o se bwkha beraui tong lai-o; a béng-nokno se bórok khom-khom wngjak lai-o.

¹⁵Tumung khoroksa swk aro swndar khe abo tei tong glak; abono tang khebo abo chorwi tong glak.

¹⁶Borok hamyarok sal pa ya sini’-no budumsaui erwi phai-o, bari kwlang-kiling bórokni yarwng suhor sa-o.

¹⁷Bini yarwngrok holongthaino kobolo; abórok holongrogo se thangwi tongo.

¹⁸Bo aroni sokomorjak khe ‘Ang nono uáisabo nuk ya kho,’ hwnwi bo bono nornai.

¹⁹Nai di, omono bini tongthokjakmani, tei ha sakani tei kubunrokbo pepla sanai.

²⁰“Nai di, Kaitor majra kwrwi borokno khibi glak, bórokno samung hamya tangnairokni yagobo yaphar glak.

²¹Hai phano bo nono bwkha srang rwui tonnai; tei nwng tongthogwi rwchabwi tongnai.

²²Nono naislernairok lachimasingcha ma wngnai; tei borok hamyarokni nokrok komornai.”