Read Kok Borok JOB 9 Bible Online

JOB 9 - Kok Borok bible

JOB 9

²“Ao, ang saui mano, abo kubuino; tamo khe bahai khe thwiblang borokba Kaitorni thani borok sói wngwi mannai?

³Tumung khoroksa swk bo bai kók ekna muchung khe, sabo se kók phirok phirwi mannai, tháisasai-o, tháisabo man glak.

⁴Bo le belaino sijak tei phanbo kwrak, sabo bono kebengwi mannai? Bono sabo ba mechenwi mannai?

⁵Bo se hatháirokno noro tei bórok abono si ya, jolima bai bo abórokno swbai-o.

⁶Bo se haktorno bangla bai ninang rw-o, tei haktorni thonglarokno jangri-o;

⁷Bo salno dagi khe kasa ya khlaiwi mano; bo se athukirirokno pasa ya khlai-o;

⁸bo saichung’-no nokhano phologo, tei twijlangni twi aphalno kádulo;

⁹bo se nokhani athukiri takhuksnirokno, athukiri polbang tei athukiri tokma kokrorok tei salgrabaini athukiri hatraino snamo;

¹⁰bo se aswk uansugwi man ya samung kotor kotor khlai-o, bini kwmamsingcha samungno lekhaui pái man ya.

¹¹Nai di, bo ani gana tẃi lái-o, hai phano ang bono nuk ya; bo le ayang uyang tháng-phai wngwi tongo tamo khe ang abono romwi se man ya.

¹²Bo muchung twino segwibo tlango; bono sabo kasu-ui mannai? Bono sabo ‘Nwng tamo khlai?’ hwnwi sẃng raknai?

¹³“Kaitor bini jolimano pok ya; Bini kebengnai arirokni bokhorokno bo kádul kha, bórok bono kebengnai ari Rahabno[7] chubanairok.

¹⁴Hakhe ang bubotẃi kókthái kholwi ba bono uphilwi sa phinai?

¹⁵Ani mungsa cha ya kwrwi phano, ang bono mungsa sa phirwi man ya; ano majra bernairokno ano khairok di hwnwi se ang sa thai.

¹⁶Tumung ang bono koiwi ring khe bo abono khlai-o, bo ani ringmano khna anw hwnwi ang poito se khlai ya.

¹⁷Bo ano nokbar kotor bai swbai-o, tei ahai’-no kwsarok báng rwui rw-o;

¹⁸bo ano hama na sana suda rw li ya, tamo khe ano bwkha nang rwma bai supung kha.

¹⁹Phan bataina khe bo se phan gwnangsa; bujni kók sa khebo, sabo bono bujo ringnai?

²⁰Ang borok sói wng phano ani khúk se ano hamya sa rw anw; ani mungsa cha ya kwrwi phano, bo ani cha yano phunugui rw-o.

²¹Ani mungsa cha ya kwrwi; ang sakno se saui man li ya; ani langmano ang naisler kha.

²²Abo bebakno baksa; aboni bagwi ang sa-o, bo borok kahamnobo sokomoro tei borok hamyanobo sokomoro.

²³Achomsa khe digi-sigi bai buthar khe, bo borok sutrangrokni komormungno nugwi mwnwi-o.

²⁴Borok hamyani yago o hano rwjak kha; buj thumnairokni mokolno bo muthup kha, abo bo khlai ya khe sabo khlainai?

²⁵“Ani langmani salrok le khachigwi thángnaini slái se kodo; bórok khachigwi lái-o, mungsa kaham phano bórok nuk ya.

²⁶Ani salrok rung kodo hai khe doui tháng tẃi khe thángo, toling mui choprok tẃi khe doui thángo.

²⁷Tumung ang, ‘Ang ani kók berwi sanano poknai, tei ani mwkhang somnano khibiui khápang srangnai,’ hwnwi sa khe,

²⁸ang ani sátokjakmano kiri-o, tamni hwn ba nwng ano srai-srai hwnwi gosi glak.

²⁹Ang majra berjaknai, hakhe tamni ang haino samung tangnai?

³⁰Ang sakno kothor bai su phano tei chakhwi bai yak sú phano; abo phur glak,

³¹hai phano nwng ano hakhoro khiklainai, ani ríbo ano selengjaknai.

³²Tamni hwn ba bo le ang hai thwiblang ya, bini sẃngmano saui mannani, tamo khe chwng se bini bujo pal khe bacha thai.

³³Chini kwcharo khoroksabo kwrwi, chwngno sabo yak rwnai?

³⁴Tumung bo ani oroni raidangno khochaui tlang khe, bini sikirimungrok bai ano sikiri ya khe,

³⁵hakhe ang bono kiri yaui kók sanai, tamni hwn ba ang le ang hwnwi uansukjakma hai w se wng ya.