Read Kok Borok LOBMUNG 102 Bible Online

LOBMUNG 102 - Kok Borok bible

LOBMUNG 102

¹O Subraiyung ani surima khna ja di, ani kapma nini thani klai thung.

²Digi-sigini salo ani thani mwkhang ta kholop ja di. Ani bwkhak nini khunju kai ja di; ang ring phuru dakti-dakti khe khna ja di.

³Ani salrok hoku hai khe lái thángo, tei ani bekrengrok buphang hai khe kham kha.

⁴Ani bwkha bái kha tei sam hai khe hoicha sa kha; ang mai chána pok kha.

⁵Tamoni hwn ba sotonwi kap máng-kap máng, ani bekreng bai bukur swrapjak.

⁶Ang hasing panthorni duduma[37] hai se wng si-o; haphar bukchani tákhuk hai wng kha.

⁷Ang sichaui tongo; ang núkhung khúngchili-o masa susuk bajak tóksa hai.

⁸Ani kenarok sapung ano thesra kariui hamya sa lai-o; ano jolinairok swrai laina bagwi ani mungno khu lai-o.

⁹Ang thaplano chámung hai khe chá kha tei ani nungmungrok bai ani muktwi sabuljak kha,

¹⁰nini thamchi tei jolimarokni bagwi se ahai wngo; tamni hwn ba nwng ano kuchugo tisaui songraui khiklai kha.

¹¹Ani langma le sanjani sampili hai wng kha; ang samrok hai ransaui tháng kha.

¹²Tamo khe, o Subraiyung nwng tong phlainai; nini mung piri-piri-o kusung kusung tongnai.

¹³Nwng bachanai tei Siyonno khairoknai, tamni hwn ba tabukno bono khairokna jora; chongjak jora sók phai kha.

¹⁴Tamoni hwn ba nini selengrok a holongrokno hamjago, tei bini hadlwirokno khairok jago.

¹⁵Dopharok Subraiyungni mungno kirinai, tei hani bugrarok nini chẃngsachano kirinai.

¹⁶Tamoni hwn ba Subraiyung Siyonno songchanai; bo bini chẃngsacha bai nukjaknai.

¹⁷Bo kusupjaknairokni surimanobo khnanai, tei bórokni surimano sak nang ya wng glak.

¹⁸Abo thinangni pirirokni bagwi swiwi narwkjak anw, hakhe tabukbo achai ya kho bororok Subraiyungno lob anw:

¹⁹bo bini kwthar kuchuk tongthai-o tongwi naikhlaiwi kha, Subraiyung chuknoha-o tongwi ha-o naikhlaiwi nai kha,

²⁰khajakrokni khorang khnana bagwi, thwina bagwi chongjakrokno phiyókna bagwi.

²¹Hakhe Subraiyungni mung Siyonno sa khlaijaknai, tei Jerusalemo bo lobjaknai,

²²bororok kwrẃngsa khe kuthum lai phuru, tei Subraiyungno monna bagwi bugrarok kuthum anw.

²³Bo ani phanno kwchar thani swbai rw kha; bo ani ayuk bara rw kha.

²⁴Ang hai hwnwi sa kha, “O Subraiyung, mol brúm tongnaisa, chwrai umoro ani langmano ta tlang ja di.”

²⁵Kusung kusung mol swkang nwng o swngcharni yaphang lu kha, tei nokhayungrokbo nini yakni samungno.

²⁶Abórok bebak komornai, tamo khe nwng khe tong phlainai; abórok rí hai kwcham wngwi thángnai. Nwng rí slái tẃi khe abórokno sláinai, tei abórok pái bainai;

²⁷tamo khe nwng le ahai’-no ahai tongo, nini bisirok pái phlai glak.

²⁸Nini selengni bwsarok kati rwjagwi tonjaknai; bórokni bwsarok nini thani songchajak anw. Daud rwchapma