Read Kok Borok LOBMUNG 103 Bible Online

LOBMUNG 103 - Kok Borok bible

LOBMUNG 103

¹O ani rangma, Subraiyungno hambai rw di, ani bwkha bisingni tong kwrwi bini mung kwtharno hambai rw di.

²O ani rangma, Subraiyungno hambai rw di, bo kaham khlaimarokno ta pok di,

³bo nini bebak cha yarokno nakar kha, tei nini bebak bemukrokno ham rw kha,

⁴bo se nini langmano hakhor kuthukni yakni mwthango, bo nono pái phlai ya hamjakma tei khairokma motok thup rw kha,

⁵nwng kwthang tong sak bo se nono manwi kaham rwui bwkha kochom rw-o, hakhe toling hai khe nwng kwtal khe sikla wngo.

⁶Subraiyung khlaithai samungno khlaiwi kusupjakrokno bujsói khlai rw-o.

⁷Bo Musino lama si rw kha, Israilsarokno bini samungno saui man rw kha.

⁸Subraiyung wng kha hamjaknai tei khairoknaisa, bo doui thamchi ka ya tei pái phlai ya hamjakmung bai kupulung.

⁹Bo majra ber phlai máng tong ya, bo joli mángbo tong phlai glak.

¹⁰Bo chwngno chini sumsokno naisigwi samung khlai ya, chini samung hamyano rwksauibo yagul su ya.

¹¹Ha bai nokha chalwi uarma swk, bini pái phlai ya hamjakmabo bono kirinairokni bagwi aswk khe kotor;

¹²salkabai bai salthángbai chalma swk khe bo chwng bai chini sumsokno swkagwi hakchal khlai kha.

¹³Bupha bwsarokno khá súkma hai Subraiyungbo bono kirinairokno khá súgo.

¹⁴Bo chwngno tamo khe snamjak saui mano; chwng hadlwi se hwnwi bini muitu tongo.

¹⁵Thwiblang borok, bini ayuk le samrok hai se; abo sula-o khum hai khe budumsaui hamwi phaisa-o;

¹⁶bini saka tẃi nokbar sibwi tháng khe abo páiwi pái-o, tei abo buro tongmani abo se sijak ya wngwi thángo.

¹⁷Tamo khe bono kirinairokno Subraiyung mol brúm brúmni simi mol brúmo bini pái phlai ya hamjakmano rw-o, tei bini bwsani bwsarokno bini kahamno rw-o,

¹⁸bini swmai narwkna bagwi tei bini dagimarok khnaui tongnairokni bagwi bo abo hai khlai-o.

¹⁹Subraiyung bini achukthayungno chuknoha-o songcha kha, tei bebakni saka-ono bini dagiphang tongo.

²⁰O Subraiyungni suarirok bono lob di bini dagi tẃi khlainai o kók khnaui tongnai o phankraksarok,

²¹bebak sengkrak suarirok, bono monnai bodolrok, Subraiyungno lob di.

²²Bebak dikholoni bo bai snamjak bebakno Subraiyungno lob di. O ani rangma Subraiyungno lob di.