Read Kok Borok LOBMUNG 106 Bible Online

LOBMUNG 106 - Kok Borok bible

LOBMUNG 106

¹Subraiyungno lob di! Subraiyungno hambai rw di; tamni hwn ba bini pái phlai ya hamjakma mol brúm brúm tongnai.

²Sabo Subraiyungni kwrak samungno saui man bainai? eba sabo bini lobmungno pái súgwi sakhlai mannai?

³Bujsói tẃinai bororok hamchajak, bórok samung kaham máng khlainairok.

⁴O Subraiyung nini bororokno nwng hamjak phuru anobo muitu khlai ja di; bórokno mwthang phuru ano chuba ja di;

⁵hakhe ang nini chongjakrokni hamma-chamano nuk anw, tei nini dopharokni tongthokma-o ang bwkha srangwi man anw, phiya angbo nini’-no bororokni bisingni hwnwi kung chugui man anw.

⁶Chini chuchusong sumsok khlai kha; chwng cha ya khlai kha tei hamya samung tang kha.

⁷Chini chuchusong Ijibo tong phuru nini uanamasingcha samungno nugwi mungsa wngjak li ya; bórok nini pái phlai ya hamjakmano muitu manjak li ya, tamo khe twijlang kwchago kuchuk kuksano[39] se kebengsa si-o.

⁸Phiya ba bo bini phankrak samungno bórokno sijak rwna bagwi bo bini mungni jarwi bórokno mwthang kha.

⁹Bo twijlang kwchakno dagi khe hakhe abo ransa kha; bo bórokno twijlang kuthuk tẃi panthor kwran tẃi khe tlang kha.

¹⁰Hakhe bo bórokno bórokni kena arirokni yakni mwthang kha, tei kebengnai arirokni yakni bórokno phiyók kha.

¹¹Bórokni kena arirokno twi kobolwi pái kha; bórokni bere khoroksa phano yók li ya.

¹²Aphuru khe bórok bini kókrokno poito khlai lai kha; bórok bono lobwi rwchap lai kha.

¹³Tamo khe bórok daktino bini samungrokno pok kha; bórok bo tamo sa naisingwi tong li ya.

¹⁴Hasinglwngo bórok belai khe chána muchungjak lai kha, tei a haphar kwrano bórok Kaitorno amjok lai kha;

¹⁵bo bórokno bórok sanmano’-no rw kha, hai phano bórokni thani rammung bemukno rohor kha.

¹⁶Bórok bathamo Musino músú lai kha tei Subraiyungni borok kwthar Aronnobo seja lai kha.

¹⁷Ha pekhagwi Dathanno monok kha tei Abiramni bodolno kholobwi pái kha.

¹⁸Bórokni bodolo hórbo chẃngsa kha; hór a borok hamyarokno kham rw súgwi pái kha.

¹⁹Bórok Horebo musuk bwsa tak lai kha tei a mang takjakno khulum lai kha.

²⁰Bórok Kaitorni chẃngsachano samrok chánai musuk bai se slái si-o.

²¹Bórok Ijibo samung kotor kotor tangnai bórokno mwthangnai Kaitorno pok lai kha,

²²Hamni ha-o uanamasingcha samungrok tangjakmano tei twijlang kwchago kwmamsingcha samungrok tangmano pok kha.

²³Aboni bagwi bo bórokno sokomorwi khibinai hwn kha; bo jolijagwi buthar baiwi páinani yakni phiyókna bagwi bini saijak bororok Musi phaimani lama-o bacha sogwi ya khe bo abo tẃi’-no khlai kha mun.

²⁴Aphuru khe bórok bini a kók rwmano poito khlai li ya tei a tongthothok hano samung nangjak li ya.

²⁵Bórok bórokni bathamo kók báng lai kha, tei Subraiyungni kókno khunju kan li ya.

²⁶Aboni bagwi bo bórokno hasing panthorono bini yak kosonwi pái-rwui pái anw hwnwi swmai rw kha.

²⁷Bini bosongrokno bosong kwbángma-o butharnai tei kwbángma ha-o pisa-piring khlainai.

²⁸Bórok Piorni Bal mwtai bai gwdalwi kha, tei kwthwirokno ratharwi barokmano chá kha;

²⁹abo hai khe bórokni samung hamyarok bai bono kha ham rw ya khlaiwi tisa kha, tei bórokni bisingo bemuk hamyarok koproi kha.

³⁰Aphuru khe Phinehas bachaui yak thabeng kha, hakhe bemukrok thak kha.

³¹Aboni bagwi bono mol brúm brúmo piri-piri-o kaham hwnwi romjak kha.

³²Bórok Meribani twi-o bo Kaitorno joli rw kha, tei bórokni bagwi Musi aphuru digi-sigi ma klai kha;

³³tamni hwn ba bórok bini pholano kebeng kha, tei aboni bagwi bini búkhúk tẃi mwchang ya kókrok ongkhor kha.

³⁴Subraiyung dagima tẃi bórok dopharokno sokomor rw li ya,

³⁵tamo khe bórok kubun dopharok bai se gwdal kha tei bórokni samungrokno srwng kha.

³⁶Bórok bórokni takjak mwtairokno mon lai kha, tei abórok bórokni khẃi wng kha.

³⁷Bórok mwtai hamyarokni thani bórokni sajwk-sajlarokno tan lai kha;

³⁸bórok borok kahamrokni thẃi kochok rw kha, sak-sakni sajwk-sajlarokni thẃi rw kha, abono bórok Kanansongni mwtairokni thani tan kha; abo bai ha thẃi bai kwthar ya wngwi tháng kha.

³⁹Abo hai khe bórok bórokni samungrok bai’-no kwthar ya wng kha, bórokni samungrok bai sak sakni samungo uaijaui baliknai wngo.

⁴⁰Aphuru khe Subraiyung bini bororokno jolijak kha, tei bo bini bororokno nor kha;

⁴¹bo bórokno dopharokni yago yaphar kha, aboni bagwi bono naislernairok bini bokhorogo kasa kha.

⁴²Bini kebengnai arirok bórokno sátok kha, tei bórok bórokni yapha-o klai kha.

⁴³Bo bórokno mwthang-mwthang kha, tamo khe bórok muchungwi bono kebengwi bacha kha tei bórokni sumsokni bagwi ma gaija kha.

⁴⁴Hai phano bo bórokni kapma khnaui, bórokno naikhlai kha.

⁴⁵Phiya ba bo bórokni bagwi bini swmaino muitu khlai kha, tei pái phlai ya hamjakma bai khe bórokno khairok kha.

⁴⁶Bo bórokno khaui tlangnairok bai khairok rw kha.

⁴⁷O Subraiyung, chini Kaitor, chwngno mwthang ja di, dopharokni bisingni chwngno thum ja di, hakhe chwng nini mung kwtharno ham bai rwui chẃngsacha khe lobwi man anw.

⁴⁸Kusung kusungo Israilni Kaitor Subraiyungno lob di, bebak bororok “Amen” hwn thung. Subraiyungno lob di! Kaitorni borok Musini Surimung