Read Kok Borok LOBMUNG 115 Bible Online

LOBMUNG 115 - Kok Borok bible

LOBMUNG 115

¹O Subraiyung, chwngno ya chwngno ya, tamo khe nini pái phlai ya hamjakma tei kók narwkmani bagwi nini mung se chẃngsacha wng thung.

²Dopharok tamoni “Bórokni Kaitor buro?” hwnnai?

³Chini Kaitor chuknoha-o tongo; bo bini muchungma hai’-no khlai-o.

⁴Bórokni takjak mwtairok rangchak tei rukphaini se, borok yak bai takmani.

⁵Abórokni búkhúk tong phano bórok kók sa ya; mokol tong phano nuk ya.

⁶Bórokni khunju tong phano khna ya; bukung tong phano báhai man ya.

⁷Bórokni yakrok tongo, hai phano tangwi man ya; yakung tong phano himwi man ya; bórokni totra bai khorang khlaiwi man ya.

⁸Abórokno taknairok phiya abórokno poito khlainairok bo abo hai’-no.

⁹O Israil, norok Subraiyungno poito tháng di! bo se bórokno chubanai tei bórokni phui.

¹⁰O Aronni núkhung norok Subraiyungno poito tháng di! Bo bórokni chubanai tei bórokni phui.

¹¹Subraiyungno kirinairok norok Subraiyungo bwkha bera di! Bo bórokni chubanai tei bórokni phui.

¹²Subraiyung chwngno muitu khe tongo; bo chwngno hamari rwnai; bo Israilni núkhungno hamari rwnai; bo Aronni núkhungno hamari rwnai;

¹³Subraiyung bono kirinai okra-kusu jotono hamari rwnai.

¹⁴Subraiyung norokno tei nini bwsarokno teibo er rw thung.

¹⁵Norokno chuknoha bai swngchar snamnaisa Subraiyung bai hamari rwjak thung.

¹⁶Chuknoha abo Subraiyungni chuknoha, tamo khe bo hano bororokno rw kha.

¹⁷Kwthwirok Subraiyungno lob ya, thwiwi siring siring wngwi thángnairok bórok Subraiyungno lob ya.

¹⁸Tamo khe chwng le tabukni simi mol pái ya sak Subraiyungno hambai rwnai. Subraiyung lobjak thung!