Read Kok Borok LOBMUNG 118 Bible Online

LOBMUNG 118 - Kok Borok bible

LOBMUNG 118

¹Subraiyungno hambai rw di tamni hwn ba bo kaham; bini pái phlai ya hamjakma mol brúmno tong phlainai!

²“Bini pái phlai ya hamjakma mol brúmno tong phlai-o” hwnwi Israilrok sa thung.

³Aronni núkhung hai hwnwi sa thung, “Bini khairokma mol brúmno tong phlai-o.”

⁴Subraiyungno kirinairok hai hwnwi sa thung, “Bini khairokma mol brúmno tong phlai-o.”

⁵Digi-sigi klaiwi ang Subraiyungno ring kha; Subraiyung ani ringmano khna kha tei kuar tongthai-o tubu-ui phai kha.

⁶Subraiyung ani bwkhak tongo, ang kiri ya. Bororok ano tamo khlai mannai?

⁷Subraiyung ano chubana bagwi ani phaising tongo; ano naislernairok mechenjakmano ang nuknai.

⁸Borokno bwkha beramani slái Subraiyungno bwkha berama ham kugo.

⁹Ojamarokno bwkha beramani slái Subraiyungni thani bokhorok bomma ham kugo.

¹⁰Bebak dopharok ano kiting kha; Subraiyungni mungwi ang bórokno tansu kha!

¹¹Bórok ano kiting kha; bórok ani bebak babai tẃi kiting kha; Subraiyungni mung bai ang bórokno tansu kha!

¹²Bórok piya kiting tẃi khe ano kiting lai kha; busu-o hór kham tẃi khe khamo; Subraiyungni mung bai ang bórokno tansu-o!

¹³Ang klai tháng thung hwnwi phan khe dagarjak kha, tamo khe Subraiyung ano chuba kha.

¹⁴Subraiyung se ani phan tei ani suar; bo ani mwthangnai wng kha.

¹⁵Borok kahamrokni ríni nogo kwplai wngwi tongthogwi rwchapma khorang: “Subraiyungni yagra yak samung kwrak khlai-o;

¹⁶Subraiyungni yagra yak kwplaima khlai-o; Subraiyungni yagra yak kwrak samung khlai-o!”

¹⁷Ang thwi glak tamo khe kwthang tongnai, tei Subraiyungni samungrokno ang sakhlainai.

¹⁸Subraiyung ano belai khe khoraiwi sátok kha, tamo khe bo ano thwinani yago yaphar li ya.

¹⁹Ani bagwi sutrangni duglam phiyogwi rw di, hakhe ang abo tẃi hapnai tei Subraiyungno hambai rwnai.

²⁰Omono Subraiyungni duglam; borok sutrangrok omo tẃi hapnai.

²¹Ang nono hambai rwnai tamni hwn ba nwng ang ringma khna-o tei nwng ani mwthangnai wng kha.

²²Nok tangnairok samung chúk ya hwnwi khibiui rwmani holongthai abono wng phai kha nok busupni holongthai.

²³Omo Subraiyungni’-no samung; chini mokolo abo uanamasingcha.

²⁴O salno Subraiyung snammani a sal; phai di chwng bwkha srangnai abono tẃiwi tongthoknai.

²⁵O Subraiyung chwngno mwthang ja di hwnwi ang nono koija-o! O Subraiyung, chwngno hamcha rw di hwnwi chwng koi ja-o!

²⁶Subraiyungni mungwi phainai bo hamchajak. Chwng Subraiyungni nogo tongwi nono hambai rw-o.

²⁷Subraiyung se Kaitor tei bono chwngno pohor rw kha. háyáni bokorongrok jora terni bwtang khe himmano bedekrok bai kha di.

²⁸Nwng ani Kaitor, ang nono hambai rwnai; nwng ani Kaitor; ang nono kuchuk khlainai.

²⁹Subraiyungno hambai rw di, tamni hwn ba bo wng kha kaham, tamni hwn ba bini pái phlai ya hamjakma mol brúmno tong phlainai.