Read Kok Borok LOBMUNG 119 Bible Online

LOBMUNG 119 - Kok Borok bible

LOBMUNG 119

¹Majra kwrwi khe tongnairok, Subraiyungni kerong tẃi tongnairok bórok hamchajak.

²Bini kók khnaui tongnairok hamchajak, bórok bwkha rw súgwi bo sama tẃi tongo,

³bórok samung hamyabo tang ya, tamo khe bini lama tẃi himo.

⁴Nwng nini phrwngmungrokno kaham khe tẃina dagi kha.

⁵Ao, nini raidarok rwksaui tongna bagwi, ani bwkha butharjak wngna tẃi wng thung!

⁶Hakhe ang nini dagimarokno kaichomwi naiwi tongwi lachimasingcha wng glak.

⁷Ang nini kerong-raida kahamrokno srwng phuru khe bwkha sutrang bai khe nono hambai rwnai.

⁸Ang nini raidarokno tẃi tongnai; ano uáisa bai ta yakar ja di.

⁹Sikla bo bahai khe kwthar khe tongnai? Abo khe nini kók tẃi tongwi se bo abo mano.

¹⁰Ang bwkha rw súgwi nono saui manna bagwi chaitogo; nini dagima lamani khibiui ano ta kobon rw ja di.

¹¹Nono kebengwi sumsok khlaijak ya tẃi khe, ang nini kókno bwkha-o chu kha.

¹²O Subraiyung nwng hamchajak; nini raidarokno ano phrwng di.

¹³Nini khukni bebak kerong-raidarokno ang ani khúk bai sa-o.

¹⁴Bororok rang-rí manẃi tongthok tẃi ang nini kók tẃi tongwi tongthogo.

¹⁵Ang nini phrwngmungrokno bwkha bai kaichomwi uansuknai tei nini lamarokno bwkha rwui naharwi tongnai.

¹⁶Ang nini raidarokno tẃiwi bwkha tongthoknai; ang nini kókno pok glak.

¹⁷Ang thangwi tongwi manna tẃi khe, tei nini kók narwgwi tongwi manna tẃi khe nini selengni kaham khlai ja di.

¹⁸Nini kerongni uanamasingcharokno ang nukna tẃi khe nwng ani mokolrokno phiyogwi rw di.

¹⁹Ang o ha-o nograi se; nini dagimarokno ano ta hui ja di.

²⁰Nini kerong-raidarokno saui manna muchungwi ani bwkha-o kango.

²¹Kung chuknairokno nwng damrogwi kulo, bórok khe bati nangjakrok, bórok nini kerongrokno yakarwi kobonjak gwja;

²²ano bórokni thesra karimarok bai tei lachimung rwmarok bai hakchal khlai di, tamni hwn ba ang nini kókrokno tẃiwi tongo.

²³Hodarokbo achuk laiwi ano kebengwi hamya chap lai kha, nini o seleng nini raidarokno bwkha-o kaichomwi uansuknai.

²⁴Nini kók se ano khápang srang rw-o, abórok se ani kókbiti rwnairok.

²⁵Ang hadlwi-o burung khe klai kha; nini kók tong tẃi’-no ano thangcha rw di.

²⁶Ani kókrokno nono sa khe nwng abo khna kha; nini kerong-raidarokno ano phrwng ja di.

²⁷Nini kerong-raidarokno ano buchi rw ja di, tei ang nini uanamasingcha samungrokno tẃi kaichomwi uansuknai.

²⁸Ani bwkha thwiwi geleui tháng kha; nini kók tongma tẃi khe ano rak rw di.

²⁹Ano tatal lamarok bai hakchal khe ton di; tei nwng khairokma bai nini kerongno ano phrwng ja di.

³⁰Ang kók narwkna lamano chongwi na kha; nini kerong-raidarokno ani bwskango khe ton kha.

³¹Ang nini kerong-raida-o chwrapsa khe romwi tongo; o Subraiyung ano lachimasingcha ta wng rw ja di.

³²Ang nini dagimarokni lama-o khachigwi thángnai, tamni hwn ba nwng ani buchimungno báng rw kha.

³³O Subraiyung ano nini kerong-raidarokno phrwng di, tei páithak sal jora ang abono tẃi tongnai.

³⁴Ang nini kerong-raidarokno bwkha rwui rákhogwi tongwi manna bagwi ano si mung rw ja di.

³⁵Ano nini dagimarokni lama-o him rw ja di; tamni hwn ba ang aro bwkha tongthogo.

³⁶Ani bwkhano nini kókrokni phaising kiphil rw di, khámaima phaising ta kiphil rw di.

³⁷Samung chúk yarokni aroni ani mokolrokno kiphilwi rw di; nini lama tẃi ano thangcha rw di.

³⁸Nono kiriui tongnai nini selengni thani nini swmaini kókno srai-srai khe rw di.

³⁹Ang kirimani a lachimasingcha bai ano hakchal khlai di, tamni hwn ba nini kerong-raidarok le kaham.

⁴⁰Nai di ang nini kerong-raidarokno se manna muchungo; nini hammung se ano thangcha rw-o.

⁴¹Nini pái phlai ya hamjakma ani thani phai thung, o Subraiyung nini kók rwjak tongma tẃi nwng ano mwthang di.

⁴²Hakhe ang ano thesra karinairokno uphilwi saui man anw, tamni hwn ba ang nini kógo bwkha bera kha.

⁴³Nini kók kubuino ani khukni ta tlang bai di, tamni hwn ba ang nini kerong-raidarogo khatungwi tongo.

⁴⁴Ang nini kerongno mol brúm brúmno tẃi phlai tongnai.

⁴⁵Ang kebengmung kwrwi khe himnai, tamni hwn ba ang nini kerong-raidarokno manna muchungo.

⁴⁶Ang bugrarokni thanibo nini kókrokno sanai, tei ang lachimungo khiklaijak glak;

⁴⁷ang nini dagimungrokno tẃi bwkha tongthogo, tamni hwn ba ang abórokno hamjago.

⁴⁸Ang hamjakmani nini dagimungrokno bórom khlainai, tei nini kerong-raidarokno tẃi kaichomwi uansuknai.

⁴⁹Nwng ano khatung rwmani, nini selengni bagwi kók rwmano muitu khlai di.

⁵⁰Nini kók ani langmano thangcha rw-o, abo ani bwkha bái phuru ano bwkha kwchang rw-o.

⁵¹Kung chuknairok ano belai khe thesra kari lai kha, tamo khe ang nini kerong lamani konorwi tháng li ya.

⁵²O Subraiyung, yaphangni simi nini kerong-raidarokno ang muitu khlai kha tei ani bwkha kwchang rw kha.

⁵³Nini kerongno khibinai borok hamyarokno ang joliui tungsa kha.

⁵⁴Ang oroni nogo tongwi thángsak nini tongmungrok ani rwchapmung wng kha.

⁵⁵O Subraiyung, horo ang nini mungo muitu khlai-o, tei nini kerongno rákhok kha.

⁵⁶O hamari ani saka-o klai kha, tamni hwn ba ang nini phrwngmungrokno narwk kha.

⁵⁷Subraiyung se ani man banta; ang nini kókrokno khnaui tongnai hwnwi swmai rw-o.

⁵⁸Ang bwkha rw súgwi nini hamarino nai kha; nini kók rwma tẃi’-no ano khairok ja di.

⁵⁹Ang nini lamarokno uansuk khe, ang nini kók kerong-raida phaising ani yapri uphilwi sé kha.

⁶⁰Ang nini dagimungrokno narwkna bagwi do kha, ler li ya.

⁶¹Borok hamyarokni dwkhwi ano phán phano ang nini kerongno pok li ya.

⁶²Nini kerong-raidarok kahamni bagwi ang hor kuthugo ang nono lobna bagwi bacha-o.

⁶³Ang nono kirinai tei nini phrwngmano tẃinairokni kiching pal.

⁶⁴O Subraiyung, o ha nini pái phlai ya hamjakma bai kupulung; ano nini tongmungrokno phrwng ja di.

⁶⁵O Subraiyung, nini kók rwma tẃi nwng nini seleng bai kaham khe tongo.

⁶⁶Ano bujsói kaham bai elem phrwng di, tamni hwn ba ang nini dagimungrokno poito khlai-o.

⁶⁷Koinene khlai rwjak ya sini swkang ang lama koróui tongmani tamo khe tabuk ang nini kókno tẃi-o.

⁶⁸Nwng kaham tei samung kaham khlai-o; ano nini tongmungno phrwng di.

⁶⁹Kung chuknairok ano tẃi kók tatal sa-o, tamo khe ang khe bwkha rwui nini phrwngmarokno tẃinai.

⁷⁰Bórokni bwkha bupham hai borsajak, tamo khe ang nini kerongo tongthoknai.

⁷¹Ang koinene khlai rwjakmani abo ani bagwi kaham se, abo ang nini tongmungno rwngna bagwi se.

⁷²Nini búkhúkni kerong ani thani sai-sai rangchak-rukphaini sláibo kaham kuk.

⁷³Nini yakrok ano tago tei snamo; tei nini dagimungrokno rwng rwna bagwi ano si rw-o.

⁷⁴Nono kirinairok ano nugwi bwkha tongthok anw, tamni hwn ba ang nini kógo khatung kha.

⁷⁵O Subraiyung, ang saui mano nini bujsóirok wng kha sói tei nwng kók narwgwi ano koinene khlai kha.

⁷⁶Nini selengno kók rwma tẃi nini pái phlai ya hamjakmung ano bwkha kwchang rwnai wng thung.

⁷⁷Ang thangwi tongna tẃi khe nini khairokma ani thani phai thung; tamni hwn ba nini kerongo se ani tongthokma.

⁷⁸Kung chuknairok ma lachi thung, tamni hwn ba bórok ano sokomorna bagwi tatal khe berwi sa kha; ang khe nini kerong-raidarokno tẃi kaichomwi uansuknai.

⁷⁹Nono kirinairok ani thani kiphil thung, hakhe bórok nini kerong-raidarokno saui mannai.

⁸⁰Nini kerong-raidarokno tẃiwi tong phuru ani bwkha srai-srai wngwi tong thung, hakhe ang lachimungo ta ma klai thung.

⁸¹Nini mwthangmano naisingwi ang leng kha; nini kókno se ang khatungwi tongo.

⁸²Nini kók rwmani nang phainano mokol logwi naisingwi tongwi ani mokol nuk tha ya wngwi phai kha; ang hai hwnwi hwn kha, “nwng buphuru ano bwkha kwchang rwnai?”

⁸³Ang hoku nangjak angur bwtwi tonjaknai bukurni sola hai wng kha, hai phano ang nini tongmungrokno pogwi tháng ya.

⁸⁴Nini o seleng sal bwswk tongnai? buphuru nwng ano sátoknairokno buj thumnai?

⁸⁵Kung chuknairok ani bagwi hakhorrok khur lai kha; bórok nini kerongno naisler jago.

⁸⁶Nini bebak dagimarok poito thángjaknai máng; ang ereng-erengno sátokjak kha; ano chuba ja di!

⁸⁷Bórok ano o ha sakani swkwmaui pái tẃi’-sa khlai kha; hai phano ang nini phrwngmarokno khibi li ya.

⁸⁸Nini pái phlai ya hamjakma bai ano thangcha rw ja di, hakhe ang nini dagima kókno khnaui tongwi mannai.

⁸⁹O Subraiyung tong phlaiwi tongo; nini kók chuknoha-o songchajak.

⁹⁰Nini kók narwkmung piri-pirino tongo; nwng o hano songcha kha tei abo tong phlai-o.

⁹¹Tabuk bo nini chong tẃi’-no bebakno tongo, tamni hwn ba bebakno nini seleng máng.

⁹²Tumung nini kerongo ani tongthokma wng ya hwn khe, ang ani dukhu phuruno ang komorwi tháng kha mun.

⁹³Ang nini phrwngmarokno pok phlai glak, tamni hwn ba nwng abo bai ano thangcha rw kha.

⁹⁴Ang le nini se; ano mwthang ja di, tamni hwn ba ang nini phrwngmarokno naituk kha.

⁹⁵Borok hamyarok ano butharna bagwi naising lai kha, tamo khe ang nini kókrokno kaichomwi uansugo.

⁹⁶Ang bebakni se ká súk ya nuk kha, tamo khe nini dagimung le belaino kuar.

⁹⁷Ang bwswk se nini kerongno hamjak! ang sapung omono tẃi kaichomwi uansuknai.

⁹⁸Nini dagimungrok ano ani kena arirokni slái siyan gwnang khlai-o, tamni hwn ba abórok mol brúmno ang bai tongo.

⁹⁹Ang ano phrwngnai bebakni sláibo si kugo, tamni hwn ba ang nini kókrokno kaichomwi uansugo.

¹⁰⁰Ang chakra bororokni sláibo si kugo, tamni hwn ba ang nini phrwngmarok tẃi khe tong kha.

¹⁰¹Nini kókno narwk manna bagwi ang bebak lama hamyani ani yakungno kasu kha.

¹⁰²Ang nini dagimung kókni bár ya, tamni hwn ba nwng’-no ano phrwngo.

¹⁰³Nini kókrok ani thani bwswk se kwtẃi, abo ani khugo piya bwtwini sláibo kwtẃi!

¹⁰⁴Nini phrwngmarok bai ang saui mano; aboni bagwi ang bebak tatal lamano selengo.

¹⁰⁵Nini kók, ani yakungni chati tei ani lamani pohor.

¹⁰⁶Ang nini kerong-raidarokno rákhoknai hwnwi swmai tang kha, hakhe ang abono’-no khlainai.

¹⁰⁷Ang belai khe dukhu manjak kha; o Subraiyung, nini kók tong tẃi’-no ano thangcha rw di.

¹⁰⁸O Subraiyung, ani lobmung yapharmano yachak ja di tei nini kerong-raidarokno ano phrwng ja di.

¹⁰⁹Ani langma lái tẃi-lái tẃi wngjak khe máng ma tong kha, hai phano ang nini kerongno pok ya.

¹¹⁰Borok hamyarok ani bagwi uarai chak kha, hai phano ang nini phrwngmungrokni lama koró ya.

¹¹¹Nini dagimung kókrok se ani man-banta wng phlai kha; abórok ani kháni tongthokma.

¹¹²Nini tongmungno mol brúmno tẃi tongna bagwi ang bwkha chap kha.

¹¹³Ang bwkha dalnwirokno chajak ya, tamo khe ang nini kerongno hamjago.

¹¹⁴Nwng se ani huijakthai tei ani phui; ang nini kógo khatungo.

¹¹⁵Samung hamya tangnairok ani oroni tháng di, tamni hwn ba ang ani Kaitor dagimarokno se khnanai.

¹¹⁶Nini kók rwma tẃi’-no nwng ano romwi ton ja di, hakhe ang kwthang tongnai tei ani khatungmano tẃi ano lachimungo ta khiklai ja di.

¹¹⁷Ano rom ja di, hakhe ang yógwi tongnai tei ang nini tongmungno tẃi phlai máng tongnai.

¹¹⁸Nini kerong-raidani phérwi thángnairokno nwng samung nang ya khlai kha.

¹¹⁹Nwng ha sakani bebak borok hamyarokno khi khibi tẃi khe khibiui rohoro; Aboni bagwi ang nini kókrokno hamjago.

¹²⁰Nono kiriui ani sakni buikhumu bacha-o, tei ang nini bujrokno kiri-o.

¹²¹Ang sói khe buj tei samung kaham khlai kha; ani sátoknairokni yago ano ta yaphar ja di.

¹²²Nini selengni kaham khlainani sói wng súk di; borok hamyarok bai ano ta sátok rw di.

¹²³Nini mwthangma bai nini kók rwmano naisingwi tongwi ani mokol murumjagwi tháng kha.

¹²⁴Nini pái phlai ya hamjakma bai tongma tẃi’-no nini selengno khlai ja di tei ano nini tongmungrokno phrwng ja di, nini tongmungrokno ano phrwng ja di.

¹²⁵Ang nini seleng se; ano siyan wng rw di, hakhe ang nini kókrokno buchiui man anw.

¹²⁶Omo Subraiyungni samung tangna jora, tamni hwn ba nini kerong swbaijak kha.

¹²⁷Aboni bagwi ang rangchakni sláibo, rangchak kaham kukni slái se nini dagimungrokno hamjago.

¹²⁸Kubu-kubui’-no ang nini dagimungno naharwi se ani yapri sénai; ang jotto lama cha yarokno naislero.

¹²⁹Nini kókrok le katswi uanamasingcha; aboni bagwi ang abórokno khna-o.

¹³⁰Nini kókrok phunukjak khe pohor rw-o; abo borok sutrangrokno buchimung rw-o.

¹³¹Ang khuaui pho-pho wng kha, tamni hwn ba ang katswi nini dagimungrokno naisingwi tongo.

¹³²Nini mungno hamjaknairokno nwng khlaima tẃi’-no, ani bwkhak uphilwi ano khairok ja di.

¹³³Mungsa samung hamyarok bai ang koboljak ya tẃi khe nini kók rwma tẃi khe ani yaprino rak rw ja di.

¹³⁴Ano bororok bai sátokjakmani yakni phiyók ja di, hai khe ang nini phrwngma kókrokno tẃinai.

¹³⁵Nini mwkhangno nini selengni thani chẃng rw ja di tei ano nini tongmungrok phrwng ja di.

¹³⁶Nini kerongrok rákhokjak yani bagwi ani mokolni muktwi twima botẃi khe yorkhlai kha.

¹³⁷O Subraiyung nwng bujsói khlainaisa, nini buj thummarokbo sói.

¹³⁸Nwng dagimungrokno bujsói bai tei nini kók narwkmarok bai khe rw kha.

¹³⁹Ani kena arirok nini kókrokno pok baimani bagwi ani muchungma bángsa kha.

¹⁴⁰Nini kók rwma belai srai-srai, tei nini seleng abono hamjago.

¹⁴¹Ang belai bwsate tei norjak se, hai phano ang nini kók phrwngmungrokno pok ya.

¹⁴²Nini kaham le abo tong phlainai kaham se; tei nini kerong wng kha kubui.

¹⁴³Dukhu bai ma kengaimarok ani thani phai-o, tamo khe nini dagimungrogo ani tongthokma.

¹⁴⁴Nini dagimungrok mol brúmno sói; ano si rw di hakhe ang thangwi tongnai.

¹⁴⁵Ang bwkha rw súgwi kabo; o Subraiyung khna di. Ang nini tongmungno tẃi tongnai.

¹⁴⁶Ang nini thani kabo; ano mwthang ja di, hakhe ang nini dagimungrokno tẃinai.

¹⁴⁷Ang sal kasa ya sini bachaui chubamung sanwi kap kha; ang nini kókrogo khatungwi tongnai.

¹⁴⁸Nini kók rwmano kaichomwi uansukna bagwi hor ai ya sini swkang ang sichaui tongo.

¹⁴⁹Nini pái phlai ya hamjakma bai ani khorangno khna ja di; o Subraiyung, nini buj bai ani langmano mwthangwi ton ja di.

¹⁵⁰Ano hamya khlaina bagwi sátoknairok ani phaising seder saui phai kha; bórok nini kerong bai chaljak gwja.

¹⁵¹Hai phano, o Subraiyung nwng le samo’-no tongo tei nini bebak dagimarok kubui.

¹⁵²Mol brúmni bagwi tong phlainai nini dagimung kókrokno ang yaphangni simi’-no saui mano.

¹⁵³Ani dukhuno nai di tei ano mwthang ja di, tamni hwn ba ang nini kerongno pok ya.

¹⁵⁴Ani bagwi sachru ja di, ano phiyók di; nini kók rwma tẃi’-no ano thangcha rw phi di.

¹⁵⁵Borok hamyarok bai mwthangmung hakchal, tamni hwn ba bórok nini tongmungno sak nangjak ya.

¹⁵⁶O Subraiyung, nini khairokmarok wng kha kotor; nini chongma tẃi’-no ano thangcha rw di.

¹⁵⁷Ano sátoknai bai kenarok kwbángma, hai phano ang nini dagimungrokno bár ya.

¹⁵⁸Kók rwui kók narwk yarokno ang naislero, tamni hwn ba bórok nini dagimarokno khna ya.

¹⁵⁹Nai di ang bwswk se nini phrwngmano hamjak; nini pái phlai ya hamjakmung bai khe ano mwthangwi ton di.

¹⁶⁰Nini bebak kókno kubui; tei bujsói kerong-raidarok mol brúmno tong phlainai.

¹⁶¹Tẃiphangrok ano ereng-erengno sátok lai-o, tamo khe ani bwkha bisingo le nini kókno bórom khlaiwi kwlwibra-o.

¹⁶²Choba-o manwi-khwnwirok man rwgwi tongthoknai hai khe ang nini kerongno tẃiwi tongthogo.

¹⁶³Tatalno ang chajak ya tei selengo, tamo khe nini kerongno hamjago.

¹⁶⁴Nini sói-kaham phrwngmungrokni bagwi salo uáisni ang nono lobo.

¹⁶⁵Nini kerongno hamjaknairok belai bwkha kwchango; mungsa phano bórokno khiklai man ya.

¹⁶⁶O Subraiyung ang nini mwthangmano khatungo, tei nini dagimungrokno khna-o.

¹⁶⁷Ang nini dagimungrokno khna-o; ang abórokno belai khe hamjago.

¹⁶⁸Ang nini phrwngmung tei kerong-raidarokno khnaui tongo tamni hwn ba ani tong kwrwi nini bwskango pháng-pháng.

¹⁶⁹O Subraiyung, ani kapma nini khunju-o klai thung; nini kók tongma tẃi’-no ano si rw ja di.

¹⁷⁰Ani koiwi sanmarok nini aro sógwi si thung; nini kók tongma tẃi’-no ano phiyók ja di.

¹⁷¹Ani khúk bai ang nono lobsanai, tamni hwn ba nwng ano nini tongmungrokno phrwng kha.

¹⁷²Ani bwslai bai khe nini kók rwmarokno tẃiwi rwchapnai, tamni hwn ba nini bebak dagimarok wng kha sói.

¹⁷³Nini yak ano chubanani tiyar tong thung, tamni hwn ba ang nini phrwngmungrokno khnana bagwi bwkha chap kha.

¹⁷⁴O Subraiyung ang nini mwthangmano khatungwi tongo, nini kerongo se ani tongthokma.

¹⁷⁵Ano mwthangwi ton di, hakhe ang nono lobwi tongwi mannai tei nini kerong-raidarok ano chuba thung.

¹⁷⁶Ang mera kwmajak hai khe lama koró kha; nini selengno rutugwi kari phai ja di, tamni hwn ba ang nini dagimungrokno pok ya.