Read Kok Borok LOBMUNG 135 Bible Online

LOBMUNG 135 - Kok Borok bible

LOBMUNG 135

¹Subraiyungno lob di! Subraiyungni mungno lob di; o Subraiyungni selengrok bono lob di,

²o Subraiyungni nogo monwi tongnairok Kaitorni nokhla-o samung tangwi monnairok.

³Subraiyungno lob di, tamni hwn ba Subraiyung wng kha kaham; bini mungno lobwi rwchap di, tamni hwn ba bo wng kha kaham.

⁴Tamoni hwn ba Subraiyung Jakobno bini bagwi chong kha, Israilno sak baithangni khlai kha.

⁵Tamoni hwn ba ang saui mano Subraiyung wng kha kotor; Subraiyung tei mwtairokni sláibo kuchugo.

⁶Subraiyung bini khlaina muchung tẃi’-no khlai-o, nokha-o hwn di ha-o hwn di twijlangrok tei kuthukrogobo haino khlai-o.

⁷Bo se ha páithakni chumuirok kasa rw-o; bo uatwini bagwi nokha philik rw-o tei bini khatiui tonmani aroni nokbarno tikhlaiwi tubu-o.

⁸Bo se ha Ijipni borok bai mal-matarokni tei bororokni swkang sakrano butharo;

⁹bo’-no ha Ijibo norokni bisingo, Pharao tei bini selengrokni bwskango soidomno khlai-o.

¹⁰Bo kwbángma dopharokno kosonwi swprak kha tei phan gwnang bugrarokno buthar kha

¹¹Amorni habugra Sihon, Basanni habugra Og tei Kananni habugrarokno

¹²tei bini borokni hano bórokni khlaiwi, Israilni baithangni khlaiwi yaphar kha.

¹³O Subraiyung nini mung mol brúmno tong phlai-o, nini mukumu bosongni kusung-kusungono tong phlainai.

¹⁴Tamoni hwn ba Subraiyung bini bororokno bujsói khlainai, tei bo bini selengrokno khairoknai.

¹⁵Dopharokni takjak mwtairok rangchak bai rukphaini, borokni yakrokni samung se.

¹⁶Bórokni búkhúk tongo, hai phano kók sa ya; bórokni mokol tongo hai phano nuk ya;

¹⁷bórokni khunju tongo hai phano khna ya, tei bórokni búkhúkrogo rangma suda kwrwi.

¹⁸Abórokno taknairok tei poito khlaiwi bwkha beranairokbo bórokbo abórok haino wngnai.

¹⁹O Israilni núkhung Subraiyungno hambai rw di. O Aronni núkhung Subraiyungno hambai rw di.

²⁰O Lebini núkhung Subraiyungno hambai rw di! Subraiyungno kirinairok, bono hambai rw di!

²¹Siyono tongnaisa Subraiyungni chẃngsacha Siyonni phai thung. Subraiyung lobjak thung! Norok Subraiyungno lob di.