Read Kok Borok LOBMUNG 145 Bible Online

LOBMUNG 145 - Kok Borok bible

LOBMUNG 145

¹Ang nono lobsanai o ani Kaitor ani bugra, tei nini mungno mol brúm brúm lobwi tongnai.

²Sal brúmno ang nono hambai rwnai, mol brúm brúm ang nini mungno hambai rwnai.

³Subraiyung wng kha belai kotor tei lobjakna chúkjak; bo bwswk kotor abo saui pái man ya.

⁴Piri kaisa tei kaisa pirini thani nini samungrokno bólai sa anw tei nini phankrak samungrokni kókno sakhlai anw.

⁵Ang nini phankrak chẃngsachano tei uanamasingcharokno tẃiwi ang kaichomwi uansuk anw.

⁶Bororok nini kwmamsingcha samungni kókrokno sa lai anw tei ang nwng bwswk se kotor abono sanai.

⁷Bórok nini chẃngsacha mungno tei kahamrokno tẃi sanai tei khorang kotor khe nini kahamno tẃiwi rwchapnai.

⁸Subraiyung wng kha khairokma tei hamjakma bai kupulung, doui joli ya tei pái phlai ya hamjakmano saui pái man ya.

⁹Subraiyung bebakni bagwino kaham bini bebak snamjakrokni bagwi bini khairokma tongo.

¹⁰O Subraiyung, nwng bai snamjakrok nono hambai rw-o, nini kók narwgwi tongnairok nono hambai rwnai.

¹¹Bórok nini hani chẃngsachano tei nini phanno tẃi sanai,

¹²bororok nini phankrak samungrokno si rwna bagwi tei bini hani chẃngsacha phanno saui man rwna bagwi.

¹³Nini ha le komor phlai ya kusung kusung nini ha tong tongo. Subraiyung bini bebak kók rwmarokno narwgo tei bini bebak snamjakrokno hamari rw-o.

¹⁴Subraiyung klai twtwi wngwi tongnairokno romwi narwgo tei klai thángjakrokno tisa-o.

¹⁵Bebakni mokolrok nono naisigwi tong lai-o, tei nwng bórokno jora-o chámung rw-o.

¹⁶Nwng nini yakno phiyogwi, bebak rangma gwnangni bwkha kochom rw-o.

¹⁷Subraiyung bini bebago’-no sói, tei bini bebak samungrokbo sói.

¹⁸Subraiyung bono ringnairokni bono bwkha rwui ringnairokni samo’-no tongo.

¹⁹Bo bono bórom rwui kirinairokni bwkhani muchungmarokno khlai-o; bo bórokni kapmano khnanai tei bórokno mwthangnai.

²⁰Subraiyung bono hamjaknairokno mwthango, phiya ba bebak borok hamyarokno khe sokomornai.

²¹Ani khúk bai Subraiyungno lobnai, hani bebak bahan bwthẃi gwnangrok mol brúmno bono hambai rwnai.