Read Kok Borok LOBMUNG 17 Bible Online

LOBMUNG 17 - Kok Borok bible

LOBMUNG 17

¹O Subraiyung, bujsóini bagwi ani koimano khna ja di; ani kapmano khna ja di; ani surimano khunju kai ja di, tamni hwn ba omo borok kahamni surimung se ba.

²Ani buj nini aroni phai si thung; nini mokol ani chama-o klai thung.

³Tumung nwng ani kháno chánai nai khe horo nwng ano naichom khe, nwng ani thani mungsa cha ya man glak; ani búkhúk bai ang sumsok khlai ya.

⁴Bui khlaima hai nini dagimungrok bai ang tongmung sitra tongnairokni lamani hakchal khe tong kha.

⁵Ani yaprirok nini lama-o doui swkangwi thángo; ani yapri kásle ya.

⁶Ang nono ringo, tamni hwn ba, nwng ani surimano khna-o, O Kaitor; ano khunju kai ja si di, ani sanmarokno khna ja di.

⁷O mwthangnaisa nini yagra bwkhak tongwi bórokni kebengnai arirokni yakni katiui yókna bagwi phainaino uanamasingcha khe nini thák phlai ya khairokmano phunuk ja di.

⁸Mukchlwino kati rw tẃi khe ano kati rwui ton ja di; nini kangkhung tola-o ano khobwi ton ja di,

⁹borok hamyarok ano kusupnairok, ano gerepsajak, sokomornairokni yakni ano phiyók ja di.

¹⁰Bórok bórokni khairokmano khibi kha; bórok kók kotor sa lai-o.

¹¹bórok ano kitingwi gerep sa kha; bórok ano ha-o khiklaina bagwi mokol kaichom lai kha.

¹²Bórok singho bini muino uásikna muchungjak tẃi muchungjago singho sikla huijagwi mui romna nai tẃi khe tongo.

¹³O Subraiyung bacha di, bórokno kebengwi phuichaui khibi di! Nini seng bai khe borok hamyarokni yakni ani langmano mwthang ja di,

¹⁴o Subraiyung, nini yak bai borokni yakni, o swngcharo simi gwnangrokni yakni ano mwthang ja di. Bórokni banta nwng khatiui tonmarok bórok man thung; bórokni bwsarokbo manjakna tongmani slái teibo manjak thung; bórokni bwsa-bẃtẃirok bórokni karjak tong rwkmarokno ma manjak thung.

¹⁵Ang khe derama kwrwi khe nini mwkhangno nainai; ang sicha khe nini mwkhang naisigwi bwkha kochomnai. Rwchapmung tẃithernaini bagwi Daudni rwchapmung. Subraiyungni seleng bono Solni yakni tei bono kebengnai arirokni yakni phiyók phuru Subraiyungno lobwi rwchapmani