Read Kok Borok LOBMUNG 22 Bible Online

LOBMUNG 22 - Kok Borok bible

LOBMUNG 22

¹Ani Kaitor, ani Kaitor, nwng ano tamoni yakar lang? Nwng ano chuba yaui tamo hakchalwi tong, tamo ani kengaiwi samarok khna ya wng lang?

²O ani Kaitor ang salo chirigwi kabo, tamo khe nwng khw se khna ya; horobo ang ringo, ani lenglamung kwrwi.

³Nwng’-no kwthar, Israilrok nini achukthayungno kitingwi lob lai-o.

⁴Chini chuchusong nono’-no poito khlai kha; bórok poito khlai khe nwng bórokno phiyók kha.

⁵Bórok nini thani kap kha, hakhe mwthangjak kha; bórok nono poito khlaiwi lachimung man li ya.

⁶Tamo khe ang le yóngsa se, borok ya; bui bai hamya sajaknai tei lukurok bai khibijak se.

⁷Ano nuknairok ano mwnwi lai-o, bórok bwkhwchwi phehelwi bokhorok jangriui hai hwnwi sa lai-o;

⁸“Subraiyungno nini pojarokno yaphar di ta; bo’-no phiyók thung bini bwkha phurjakma borokno bo’-no mwthang thung!”

⁹Nwng’-no ok bisingni ano kaham kwrwng khe tikhlai kha; Amani abuktwi cháui tong phuruni simi nwng kati rwui ton kha.

¹⁰Achai phuruni simi’-no ang nini thani yapharjak, amani ogo tong phuruni simi’-no nwng ani Kaitor.

¹¹Ang bai ta chal ja di, tamni hwn ba ani birman samphaui phai kha, tei khoroksa phano chubanai kwrwi.

¹²Musuk chwlarok ano chorsa khe kitingwi phai kha, Basanni phan gwnang musukrok ano kitingwi phai kha;

¹³bórok ano naisigwi khua lai-o, uátharnai singho hai khe sokrom lai-o.

¹⁴Ang twi hai khe lu khlaijak kha tei ani bekrengrokni jora keple bai kha; ani bwkha mundai hai wng kha; khaklap bisingo abo geleui tong kha,

¹⁵ani búkhúk harpek hai ransaui tháng kha, ani bwslai kanswka-o swrabwi tháng kha; nwng ano kwthwini hadlwi-o mokhol kha.

¹⁶Tamoni hwn ba sẃirok ano chorsa khe kiting kha; borok hamyarokni bodol ano kitingwi phai kha. Ani yak bai yakungno supla kha;

¹⁷ang ani thung kwrwi tẃi bekrengrokno lekhaui mano. Bórok ano mwlang chaui naisik kha;

¹⁸ani rírokno bórok banta khlai lai-o, ani kamchwlwi lolangni bagwi bórok pat karwi nai lai-o.

¹⁹Tamo khe O Subraiyung ang bai ta chal ja di! O ani phan, ano chubana do si di!

²⁰Ani langmano sengni yakni mwthang ja di, ani kaisa susuk langmano sẃirokni yakni mwthang ja di!

²¹Singhoni búkhúkni ano mwthang ja di! Mothwnani bokorongni nwng ano mwthang kha.

²²Ani takhuk-bukhukrokni thani ang nini mungno sanai; lukurokni bisingo ang nono lobnai:

²³Subraiyungno kirinairok, norok bono lob di! Jakobni bebak bosongrok bono lob di; Israilni bebak bosong bono bórom rwui bacha di!

²⁴Tamoni hwn ba bo digi-sigi mannairokno yabo yakar ya, khibo khibi ya; bo ano mwkhang huiwi tháng ya, tamo khe bini thani kap khe bo khna-o.

²⁵Lukuthum kotorma-o ang nono lobnai; nono kirinairokni bwskango ang ani chakmano nono rwnai.

²⁶Borok koinenerok cháui bwkha kochomnai; Subraiyungno naituknairok bono lobnai. nini bwkha kwthang wngwi tong phlai thung!

²⁷Ha yaphang buchukni jotono nono muitu khlainai tei Subraiyungni thani kiphilnai; dophani bebak bosongrok bini bwskango ma khulumnai.

²⁸Tamoni hwn ba bebak harokni bugra le Subraiyung se, dopharokni dagiphang bo se.

²⁹Ha sakani bebak kung chuknairok bono khulumnai; sakno kwthang tonwi man phlai ya thwi tẃi-thwi tẃirok jotono bini thani yáskú súngnai.

³⁰Thinangni bosongrok bono monnai; Subraiyungni kókno thinangni bosongrokni thani sajaknai,

³¹bo bororokno mwthangma kókno achai phaina tongnairokni thani sajaknai, bo tamo khlai kha abono sajaknai Daudni rwchapmung