Read Kok Borok LOBMUNG 25 Bible Online

LOBMUNG 25 - Kok Borok bible

LOBMUNG 25

¹O Subraiyung, ani bwkhano nini thani yaphar ja-o.

²O ani Kaitor, ang nini thani bwkha bera ja-o; ano lachimasingcha ta khlai ja di; ani kebengnai arirokno ano mechenwi ta tongthok rw di.

³Nono naisingnai bororok lachimung ta man thung; buino bandinai borok hamyarok lachimasingcha ma wng thung.

⁴O Subraiyung, ano nini lamarokno si rw ja di; nini lamarokno ano phrwng ja di.

⁵Nini lama kubui-o ano tẃither ja di, tei ano si rw ja di, tamni hwn ba nwng se ano mwthangnai ani Kaitor;

⁶O Subraiyung, muitu khlai ja di, agi phuruni simi nini khairokma tei hamjagwi phaimani kókno.

⁷Ani sikla phuruni sumsokrok eba samung hamyarokno muitu ta khlai ja di; o Subraiyung, nini khairokma bai tei nini kha kaham bai ano muitu khlai ja di.

⁸Subraiyung le kaham tei sói se; aboni bagwi bo sumsok gwnangrokno lama phunugo.

⁹Bo koinenerokno kubui tẃi tẃinai, tei koinenerokno bini lama phunugo.

¹⁰Subraiyungni kerong tei dagimung tẃi tongnairokni thani khe bini bebak lamarok pái phlai ya hamjakmung tei kók rwma narwkma tongo.

¹¹O Subraiyung nini mungni jarwi ani cha yarokno nakar ja di, tamni hwn ba abo belai báng laha.

¹²Subraiyungno kirinai borok le sabo? Bo bini lamano chongwi nanani phrwngnai.

¹³Bo langmarogo hamari kupulung khe tongnai, bini bosongrok ha mannai.

¹⁴Subraiyungno kiriui tongnairok bo bai kiching halok khe tongnai tei bo bórokno bini swmaino saui man rwnai.

¹⁵Ani Subraiyungni bwkhak máng naisigwi tongo, tamni hwn ba bo ani yakungno khẃini kati rwui tonnai.

¹⁶Ani bwkhak kiphil ja di, ano khairok ja di, tamni hwn ba ang saichung susuk dukhu manjak.

¹⁷Ani bwkhani dukhuno phiyók ja si di, tei tong keseprokni ano phiyók ja si di.

¹⁸Ani dukhu bai ani samano naikhlai ja si di, tei ani bebak sumsokrokno nakar ja si di.

¹⁹Ani arirok bwswk khe báng kha naisik di, tei bórok bwswk khe ano naislerjak nai di.

²⁰Ani langmano kati rwja ja di tei phiyók ja di; ano lachimasingcha ta khlai ja di, tamni hwn ba ang nini thani bwkha bera kha.

²¹Sói khe tei sutrang khe tongmani ano kati rwui tong thung, tamni hwn ba ang nono naisingwi tongo.

²²O Kaitor Israilno phiyók ja di, bini bebak digi-sigini phiyók ja di. Daudni rwchapmung