Read Kok Borok LOBMUNG 27 Bible Online

LOBMUNG 27 - Kok Borok bible

LOBMUNG 27

¹Subraiyung se ani pohor tei ani mwthangnai; sabono ang kirinai? Subraiyung ani langmani phan sabono ang kirina nangnai?

²Borok hamyarok ano kebengnai arirok ano músúnairok ani bahan chána hwnwi phai khe bórok usta khu-ui klainai.

³Sengkrakrok ani ari wngwi gerep saui phai phano ani bwkha-o kirima phai glak; ang bai choba nang laina bacha phano ani bwkha kwrak wngwi tongnai.

⁴Subraiyungni thani ang mungsa san kha, Abono’-no ang nainai; abo khe ani thangsungo sal brúm Subraiyungni nogo tong mannani tei Subraiyungni naithokmano tẃi manna tẃi khe phiya bini noktharo naitugwi tongwi mannani.

⁵Tamoni hwn ba bo ano ani digi-sigini jora bo ano huiwi tonnai; bo ano bini háyá-o kotonwi tonnai; bo ano holongthai kuchuk saka-o songchanai.

⁶Tabuk ani bokhorok ano kitingjak kebengnai arirokni slái kuchugo tei ang khorang kotor khe tongthokma bai bini noktharo ratharwi yapharnai; rwchapmung khnathok khe Subraiyungno lob di.

⁷O Subraiyung ang chirigwi ringmano khna ja di, ano khairok ja di tei sanmano khna ja di!

⁸“Phai di, ano naisik di” hwnwi nwng hwn khe “Ang nini mwkhang naisigwi tongnai o Subraiyung hwnwi” ani bwkha-o sa kha.

⁹Nwng ang bai nukjak ya khe huijagwi ta tong di. Nini selengno joliui ta khibi ja di, nwng se ano chubaui phai-o. Ano yakarwi ta rw ja di, o ani mwthangnaisa Kaitor ano ta khibi ja di!

¹⁰Ani apha bai ama ano yakar phano, Subraiyung nwng ano khochaui nanai.

¹¹O Subraiyung, nini lamano ano phrwng di, ano kebengnai arirok tongo hakhe lama srai-srai tẃi ano tẃi ja di.

¹²Ano kebengnai arirokni muchungjak tẃi ano ta khiklai ja di, tamni hwn ba tatal khe kók ruju sanairok ano kebengwi bachasa kha tei bórok hama pho-pho wngwi tong lai kha.

¹³Ang kwthangrokni ha-o Subraiyungni kahamno nuknano bwkha butharjak.

¹⁴Subraiyungno naisingwi tong di; kwrak wng di, tei bwkha ragwi nwng Subraiyungno naisingwi tong di! Ang hwno Subraiyungno naising di. Daudni rwchapmung