Read Kok Borok LOBMUNG 31 Bible Online

LOBMUNG 31 - Kok Borok bible

LOBMUNG 31

¹O Subraiyung ang nini thani bwkha bera kha; ano uáisa phano lachima-o ta khiklai ja di; nini kaham bai ano phiyók ja di.

²Ano khunju kai ja si di; ano dakti phiyók ja di. Ani katithai holongthai kwrak wng ja di, ani mwthangnai nok kwrak wng ja di.

³Kubui’-no nwng’-no ani holongthai, katijaknai nok kwrak; nini mungni jarwi ano lama phunugui tẃi ja di,

⁴ani bagwi khẃi chakjak tongmani aroni ano phiyók ja di, tamni hwn ba nwng se ano kati rwui tonnai.

⁵Nini yago ani pholano yapharo; O Subraiyung kubuini Kaitor, nwng ano phiyók kha.

⁶Nwng chúk ya mang takjak khulumnairokno selengo, tamo khe ang Subraiyungni thani bwkha bera-o.

⁷Ang nini khairokma-o pái phlai ya hamjakmungni bagwi lobsanai, tamni hwn ba nwng ani tong digi-sigino nuk kha; nwng ani kebengnai arino nai kha,

⁸tei ani kebengnai arirokni yago nwng ano khiklai rw li ya; nwng ani yakungno haphar kuaro yapri bera rw kha.

⁹O Subraiyung, ano khairok ja di tamni hwn ba ang dukhu klai tong kha; ani bwkha hamya wngmani bagwi ani mokol bena-bena wng kha tei bwsakrok ram kha.

¹⁰Ani langma dukhu-o tong kha, tei ani bisi thwgwi lengprojak[6] wng kha; ani dukhuni bagwi ani phan kwrwi kha tei bekrengrok chemai kha.

¹¹Ano kebengnai arirok bai ang hamya hwnjak kha, tei nok arirok tei sinijakrok bai kirijaknai se wng si-o, lamarogo ano nuknairok ani oroni khárwi se thángo.

¹²Thwiwi thángjak borok hai khe se sak nangjak ya wng si-o; ang manwi kwbai hai se wng si-o.

¹³Ano kitingwi kirimasingcha kókrok hunu-hanai sa laimano ang khna-o! Bórok kuthum laiwi ani bagwi hamya chap lai kha, ano butharna hwnwi bórok chap lai kha.

¹⁴Tamo khe o Subraiyung; ang nini thani bwkha bera kha. Ang hai hwnwi sa-o, “Nwng’-no ani Kaitor.”

¹⁵Ani jorarok nini yago se; ano ani kebengnai arirok tei sátoknairokni yakni phiyók ja di.

¹⁶Nini selengni saka-o nini mwkhangno chẃng rw di; nini hamjakma bai ano mwthang ja di.

¹⁷Ang nono ring ja-o, o Subraiyung; ano ta lachi rw ja di; borok hamyarok lachi rwjak thung; siring siring khe bórok kwthwirokni ha-o ma tháng thung.

¹⁸Tatal sanairok kók man ya wng thung borok kahamrokno hamya saui kók kotor sanairok, samung nang ya wngnairokbo kók man ya wng thung.

¹⁹Nono bórom khlainairokni banta nwng bwswk se manwi kahamrokno ton kha, tei nini thani katina bagwi phainairokno jotoni bwskango bwswk se hamari rw kha!

²⁰Nwng kók kotor sanairokni bwskangni bórokno nini thani hui tonnai, kók uálai sanairokni yakni phiyógwi nwng bórokno nini nogo tonnai.

²¹Subraiyung hamchajak, tamni hwn ba ang tongma kamiyung choprokjak phuru suda bo ano uanamasingcha khe hamari rw kha.

²²Ang achomsa kirima chaui, “Ang nini mokol bwskangni chal kha” hwnwi sa kha. Hai phano ang nono chubamung sanwi ring khe nwng ani koimano khna kha.

²³O bini borok kwtharrok Subraiyungno hamjak di. Kók narwknairokno Subraiyung mwthango phiya kók kotor sanairokno khe yagul su-o.

²⁴Subraiyungno khatungwi tongnairok phankrak wng di, bwkha kwrak khlai di. Daudni kóklob