Read Kok Borok LOBMUNG 33 Bible Online

LOBMUNG 33 - Kok Borok bible

LOBMUNG 33

¹O tongmung kaham tongnai bororok Subraiyungo tongthok di. Tongmung kaham tongnairok lobwi mwchango.

²Subraiyungno chongpreng bai lob di; buduk twngchi gwnang tamjaknai bai tamwi rwchap di.

³Bini thani rwchapmung kwtal rwchap di; khorang kotor khe khnathok rwui tam di.

⁴Tamoni hwn ba Subraiyungni kók le kubui, tei bini bebak samungrok bwkha beraui manna tẃi khlaijago.

⁵Bo tongmung kaham tongnairokno tei buj gwnangrokno hamjago; ha gwnangwi Subraiyungni hamjakmung bai kupulung.

⁶Nokharok Subraiyungni kók bai snamjago, bini hama bai khe bebak bini sengkrakrok wngo.

⁷Bo twijlangrokni twirokno kwrẃngsa khe twi tilogo da tẃi khe thumwi da-o; bo twi kuthukrokno tonjaknai-o rúngwi tono.

⁸Ha gwnangwi Subraiyungno kiri thung; ha gwnangwi tongnairok bebakno bono kiriui bacha thung.

⁹Bo khúk bai sa kha tei ahai’-no wng kha; tei bo sa kheno wngwi bacha kha.

¹⁰Subraiyung dopharok chap laimano sukrugwi rw-o; lukurok chong laimano samung chúk ya khlai rw-o.

¹¹Subraiyungni chapma mol brúmno tong phlai-o, bini uansukma kusung kusungo tongo.

¹²Subraiyungno Kaitor hwnnai a dopharok’-no hamchajak, bini bosong wngna hwnwi chongnairok’-no hamchajak.

¹³Subraiyung chuknoha-o tongwi naikhlai-o; bo bebak borokno naiwi tongo.

¹⁴Bini tongthaini simi bo ha saka tongnairok bebakno’-no naikhlaiwi tongo,

¹⁵bo se bórokni bwkharokno tago, tei bórokni samungrokno naichomwi tongo.

¹⁶Habugra khoroksa phano bini kwbángma sengkrakrok bai khe kati rwjagwi tongwi man ya, khoroksa phan gwnangbo bini phan bai bono phiyógwi man ya.

¹⁷Chobani korai bai kwplai wngna khatungwi tongma bo chúk ya, tei bini phankrak bai khe mwthangjagwi man ya.

¹⁸Au, Subraiyung bono kirinairokno naiwi tongo, bini pái phlai ya hamjakmungo khatungnairokno

¹⁹bórokno thwimani yakni phiyókna bagwi bok nang phuru mwthangna bagwi bo naikhlaiwi tongo.

²⁰Chini langma Subraiyungno naisingwi tongo; bo se chini chubachu tei phui.

²¹Chini bwkha bini aro tongthogo, tamni hwn ba chwng bini mung kwtharo bwkha bera kha.

²²O Subraiyung nini pái phlai ya hamjakma chini thani tong thung, nini thani se chini khatungma le. Daud Abimelekni aroni rwkhlai rohorjakna bagwi kobor hai khe tong khe bo rwkhlai rohorjak kha