Read Kok Borok LOBMUNG 36 Bible Online

LOBMUNG 36 - Kok Borok bible

LOBMUNG 36

¹Borok hamyani bwkha bisingo hamya kók sa-o; bini mokolrogobo Kaitorno kirima kwrwi.

²Bo bini sakni mokolno nuk ya khe tongwi bini cha yarokno nugwi seleng ya wngo.

³Bini khukni kókrok hamya tei bandina máng; bo kaham bai samung kaham khlainani lon ya.

⁴Bo bini thuyamo tongwi buini hamya khlaina uansugo; bo lama hamya-o bacha-o; bo samung hamyano seleng ya.

⁵O Subraiyung, nini pái phlai ya hamjakma nokha kupulung, tei nini kók narwkmung chumuirogo khu-ui-o.

⁶Nini hamma le hathái kotor hai, nini bujsói belai kuthuk; nwng se bororokno tei mal-matarokno mwthangwi tono, o Subraiyung.

⁷O Kaitor, nini hamjagwi khairokma bwswk se kaham! Aboni bagwino bebak bororok nini kangkhungni saklomo tongthai mano.

⁸Bo nini nokni chámung kupulung bai bo chámung ter khlai-o, nini bwkha kochom rwnai twisani twino nwng bono khano.

⁹Nini thani se mwthangmani twimuk tongo; nini pohor bai se chwng nugo.

¹⁰Nono hamjaknairokno nwng cho yaui pái phlai ya hamjakma bai hamjagwi tong di tei borok bwkha sutrangrokno mwthangwi ton di!

¹¹Kung chuknairokni yakung ani thani ta kw lái thung, eba borok hamyarokni yakbo ano ta nor thung.

¹²Samung hamya tangnairok botok khe klai kha; bo búpháiwi khiklai rwjak kha, tei bacha phirwi man li ya. Daudni rwchapmung