Read Kok Borok LOBMUNG 40 Bible Online

LOBMUNG 40 - Kok Borok bible

LOBMUNG 40

¹Ang bwkha logwi Subraiyungno naising kha; bo ano mokol kai kha tei ani kapma khna kha.

²Bo ano kirimasingcha hakhorni, ha kokhlaijakni socha kha, tei ani yakungno holongthai saka ka rwui ani yapri rak rw kha.

³Bo ani búkhúgo kwtal rwchapmung rw kha, tei chini Kaitorno lobmungni rwchapmung rw kha. Kwbángmano abono nugwi kirinai tei bórok Kaitorni thani bwkha beranai.

⁴Subraiyungno bwkha beraui tongnai borok bo hamchajak, bororok tatal mwtairokni bwkhak lama phérwi thángma hai, bo phérwi kung chugwi tháng ya,

⁵O Subraiyung ani Kaitor nwng uanamasingcha khlaima, samungrok chini bagwi uansukmarok kwbángma; nwng bai kebono su thai kwrwi. Ang abórokno sa baiwi páina khe ang abono lekhaui pái man ya.

⁶Ratharmung bai barokmungno nwng nai ya, tamo khe nwng ani khunjurokno phiyok kha. Nwng sógwi yapharmabo nai ya sumsokni bagwi ratharmungbo nai ya.

⁷Aphuru ang hai hwnwi sa kha, “Nai di ang oro se; bijabo ani kók swijak tongo.

⁸O ani Kaitor, ang nini muchung tẃi tongna hamjago; nini kerong ani bwkha bisingo tongo.”

⁹Borok kwbángma kuthumjago ang nini phiyókmani kókno sakhlai-o; O Subraiyung nwng si-o, nai di ang ani khúk muthup ya.

¹⁰Ang nini o mwthangmani kóktmarokno ani bwkha bisingo khe hui ton li ya, ang nini kók narwkma bai mwthangma kókno pír kha; nini pái phlai ya hamjakmano, nini kók narwkma kókno ang lukuthum kotoro khna rw yaui ton li ya.

¹¹O Subraiyung nwng ani bagwi khairokmano ta kasu ja di; nini khairokma bai nini kók narwkmani sal brúm ano mwthang thung.

¹²Kwbángma borok hamyarok ano chorsa khe kiting kha; ani samung hamyarok bángwi ano phinkhlaisaui ang tei nuk li ya; abórok ani khorokni khnaini slái báng kha tei ani bwkha thwi súk kha.

¹³Subraiyung, ano khairogwi phiyók ja di; O Subraiyung, ano dakti chuba ja si di.

¹⁴Ano butharna naituknairok bebakno ma lachi thung tei bwkha bái thung; ano hamya khlaina muchungnairok bórokno kiphil rwui rohor di tei mwkhang man ya khlai di.

¹⁵Ano “Wng kha, ham kha!” hwnnairokno sakni lachimung bai’-no kwma thung.

¹⁶Tamo khe nono naituknairok bórok nini thani bwkha srangwi tongthok thung; nini mwthangmano hamjaknairok, “Subraiyung wng kha Kotor!” hwnwi sa phlai máng tong thung.

¹⁷Ang le bigrasa tei biyalo klaijak, tamo khe Subraiyung se ani bagwi uansugo. Nwng’-no ani chubamung tei phiyóknai; O ani Kaitor ta ler ja di. Rwchapmung tẃithenani Bagwi Daudni rwchapmung