Read Kok Borok LOBMUNG 42 Bible Online

LOBMUNG 42 - Kok Borok bible

LOBMUNG 42

¹Mwswisa twi kangjagwi twi naitukma hai, o Kaitor ani langmabo abo hai kheno nono kangwi khátango.

²Ani phola Kaitorno kango, kwthang Kaitorno kango. ang buphuru Kaitorni bwskango sók phaiwi bini mwkhangno nuknai?

³Ani muktwirok se hor sal ani chámung wng si-o, lukurok khe ano “Nini Kaitor buro?” hwnwi sẃng lai máng se tong lai si-o.

⁴Ang omorokno muitu manẃi ani bwkha báiwi tongo: ang borok kwbángmarok bai thángmani, tei ang bórokno tẃiwi Kaitorni nogo thángmani, tongthok khorang bai hambai rwui rwchabwi borok kwbángma’-no terrok khlai lai-o.

⁵O ani phola nwng tamoni klai lang? ani bwkha bisingo tamoni urumuru nang lang? Kaitorno khatungnai; tamni hwn ba ang bono lob phinai, ani chubanaisa

⁶tei ani Kaitor. Ani bwkha báisuk kha; aboni bagwi ang nono ha Jordan tei Harmono tongwi, Mijar hathái-o tongwi nono muitu khlai-o.

⁷Twi bakhlaiwi khorang gurumsama saka teibo nini khorang gurumo; nini twi pupakjak twi aphalrok ani saka tẃi lái thángo.

⁸Subraiyung salo khe bini pái phlai ya hamjakmano lukhlaiwi rw-o, tei horo khe bini rwchapmungno rw-o, ano langma rwnaisano surimungrok ani thani tongo.

⁹Ang ani holongthai Kaitorno hai hwnwi hwno, “Nwng tamoni ano pok lang? ano kebengnai arirok bai sátokjagwi ang tamoni kabwi tong sinai?”

¹⁰Ani arirok ano thesra kari laiwi, “Buko sla nini Kaitor?” hwnwi samani abo ani kirimasingcha kwsa hai wng kha,

¹¹O ani phola, nwng tamoni khibiui rwjak lang? ani bwkha bisingo tamoni urumuru nang lang? Kaitorno khatungnai; tamni hwn ba ang bono lob phinai, ani chubanaisa Lobmung 42-no manju-ui sa phimani