Read Kok Borok LOBMUNG 49 Bible Online

LOBMUNG 49 - Kok Borok bible

LOBMUNG 49

¹Bebak bororok o kókno khna di; swngcharo tongnairok bebakno khunju kai bai di,

²kuchuk bai hache, kwrwi bai gwnang bebakno khna di.

³Ani khúk kók elem sanai; ani bwkhani uansukma abo saui man rwnai.

⁴Ang phrwngmungo khunju kainai; chongpreng bai khe ang kók phumukmungno kiphilwi sanai.

⁵Samung hamya tangnai kebengnai arirok ano kiting khe ang tamoni kirinai, digi-sigini salrokno ang tamoni kirinai?

⁶Bórok sakni rang-rí-o bwkha bera-o tei abono tẃi kung chugo.

⁷Bórokni bisingo khoroksa phano, khoroksani langmano le phiyógwi man ya, Kaitorno mungsa phano abono rwui su-ui man ya.

⁸Tamoni hwn ba borokni langma belai khe morok, tei aboni bagwi nangma swk khoroksa phano rwui man ya,

⁹abo bai khoroksa swk mol brúm kwthang tongwi mangkhoro klaina nangmani yakni yóknani bagwi rang-rí bai man ya.

¹⁰Chwng elem gwnangrokno nuk kha, bórokbo thwi bai kha; butuarok tei ailangrok uáisa bai komorwi thángo tei bórok buini bagwi rangchak-ríchakrok khibiui ma klango.

¹¹Bórokni mungwi bórokni harokni mung rw phano, tei bórokni bosong thwgwi kusung kusung abo bórokni tongthai hwnwi tong phano, mangkhor se bórokni mol brúmni tongthai wngnai.

¹²Borokni jolma-jolsa rang-rí tong phlai glak; bórok pun-tokrok hai komornai.

¹³Sakni rang-rí bai bwkha kochomnai butua bororok omo tẃi kheno manthai mannai. Sela

¹⁴Bórok hakhorni bagwi tonjak merarok hai; thwimung se bórokno mwrwknai wngnai; bórok katswi kwthwirokni ha-ono tongo, tei bórokni sakdukrok kwmaui páinai; kwthwi hano bórokni tongthai wngnai.

¹⁵Tamo khe Kaitor ani pholano kwthwi hani phanni yakni phiyóknai, tamni hwn ba bo ano yachaknai. Sela

¹⁶Khoroksa swk gwnang wng khe, bórokni nogo rang-rí bángsa khe ta kiri di.

¹⁷Tamoni hwn ba bórok thwiwi tháng khe mungsa phano tlangwi man glak; bini rang-rírok bo bai baksano hakhoro thángnai.

¹⁸Bórok bórokni thangsungo nini jarwi tongthothok khe tong kha hwnjaknai tei nwng nini bagwi samung kaham tang khe bórok lobjago

¹⁹bórok bórokni chuchusongni aro kiphilwi ma thángnai bórok tei pohor nuk phi glak.

²⁰Borokni jolma-jolsa rang-rí tong phlai glak; bórok pun-tokrok hai komornai. Asapni lobmung