Read Kok Borok LOBMUNG 58 Bible Online

LOBMUNG 58 - Kok Borok bible

LOBMUNG 58

¹O tẃiphangrok norok kubui khe bujsói da khlai? Norok bororokno sói khe da buj thum?

²In’-hi nwng bwkha-o sokomorna chabo; nini yak bai ha-o thamchi tungwi se kosono.

³Borok hamyarok oksingni simi’-no lama korójak; bórok achai phuruni simi’-no deraui pái-o tei tatal sa-o.

⁴Bórokni bis chibukni bis hai, bórok chibuk phepu hai khunju khna ya nathong gwja,

⁵hakhe bo chibuk mwsa rwnaini khorang khna ya, eba kók mwtai samarokno khna ya.

⁶O Kaitor bórokni búkhúkni bua swbai rw di; singho siklani buano swbaiwi rw di, o Subraiyung!

⁷Twi kochogwi kwmaui tháng tẃi bórok komor lang thung; sam hai bórok hoichaui rampra thung.

⁸Bórok sikambuk harpego kwlwgwi kwmama hai khe kwma lang thung; bohogo’-no chokhrainai sal nuk lang ya absa hai wng thung.

⁹Norokni twgo hór swlakna swkang’-no busu kwthwi bai busu kwthang khammarokno kobon rwui rohor thung!

¹⁰Bórok yagul sujakma nugwi borok kahamrok tongthoknai; bórok bórokni yakungno borok hamyarokni twi bai súchanai.

¹¹Bororok hai hwnwi sa anw, “Au, borok kahamrokni le sokat tongo; kubu kubui’-no swngcharno buj thumnaisa Kaitor tongo’-no.” Daudni rwchapmung: Sol bono butharna bagwi borok rohor rwmani yagulo.