Read Kok Borok LOBMUNG 65 Bible Online

LOBMUNG 65 - Kok Borok bible

LOBMUNG 65

¹O Kaitor Siyono nono siring siring khe lobjago; tei nini thani chakmarok rwjak anw.

²O surima khnanaisa! nini thani se joto bororok phai-o.

³Chini[19] samung hamyarok báng phurubo nwng chini bebak hamyano nakarnai.

⁴Nwng bai chongwi nini thani nokhla-o tongna tubujaknai borok hamchajak. Chwng nini nokni kaham bai tei nini nokthar bai bwkha kochomnai.

⁵Chini mwthangnaisa Kaitor, nwng kirimasingcha samungrok bai khe chwngno phiyógwi phunuknai; nwng’-no ha gwnangwi tei hakchal twijlango tongnairokni khatungjaknai.

⁶Nini phan bai hatháirokno songcha kha; nwng le phan gwnang.

⁷Nwng twijlangrok kutuksamano tei twi aphalni khorangrokno phiya bororokni khorangno siring siring khlai-o.

⁸Ha páithago tongnairok nini soidomni samung nugwi kirijago; sal ka dropni simi nwng tongthokni rwchapmung rwchap rw-o.

⁹Nwng swngcharno naikini khlai-o tei oro twi lu-ui abono nwng hamcha rw-o; Kaitorni twima-o twi kupulung tongo; nwng bororokno mai-khul kupulung khlai rw kha, tamni hwn ba omo tẃi wngna bagwi nwng’-no dagi-o.

¹⁰Ha bwtang khe khukaijago, nwng twi lukhlai-o, aboni babainwi-o milik rw-o, uatwi bai nwng abono pek rw-o, tei abono tor rwui hamari rw-o.

¹¹Nwng nini bisirokno kahamno thup rw-o; tei nini lamarok hamnani manwi pungsa rwui lukhlai-o.

¹²Haphar bukcha-o abo kupulung khe klai-o, hachukrok tongthokmungno chumjak hai,

¹³sularok mera bai kupulung wngo, harungrok bwthái bumuk bai kupulung wngo, bórok tongthogwi pal khe rwchap lai-o. Lobwi tei hambai rwui rwchapmani