Read Kok Borok LOBMUNG 68 Bible Online

LOBMUNG 68 - Kok Borok bible

LOBMUNG 68

¹Kaitor bacha si thung, bini kebengnai arirok piring-poroi wng thung; bono naislernairok bini bwskangni ma khár thung.

²Hokuno kobon rw twi bóroknobo kobon rwui rohor di; horo mundai unok tẃi borok hamyarokbo abo hai kheno Kaitorni bwskango komor thung.

³Tamo khe borok kahamrok tongthok thung; bórok Kaitorni bwskango khápang srang thung; belai khe tongthok thung.

⁴Kaitorno tẃi rwchap di, bini mungno lobwi rwchap di; chumuirogo[21] kasaui berainaisano lobsaui rwchap di, bini mung khe Subraiyung, bini bwskango bwkha srang di.

⁵Pha kwrwirok tei randijwkrokni Kati rwnaisa Kaitor bini tongthai kwtharo tongo.

⁶Orondi nangjakno Kaitor tongnani nok rw-o; bo alongo chopjakrokno phiyógwi hamari rw-o, tamo khe kebengwi bachanairokno khe tungphlajak haphar kwrano tono.

⁷O Kaitor nwng nini bororokni bwskang bwskang him phuru tei hasing panthor tẃi lái tháng phuru, Sela

⁸o ha kwlwi kha, Kaitorni bwskango nokharokbo uatwi lukhlai kha, Sinaini Kaitor,[22] Kaitorni bwskango, Israilni Kaitorni bwskango omorok wng kha.

⁹O Kaitor nwng uatwi kwbángma khe ua rw kha; hángchajak nini hano nwng thangcha rwui tisa kha;

¹⁰aro nini bororok tongthai man kha; o Kaitor nini kaham bai nwng kwrwirokni nangmarokno rw kha.

¹¹Subraiyung dagi-o; abono sakhlainai kwbángmarok hai hwnwi sa kha:

¹²“Habugrarokni sengkrakrok khár bai kha, bórok khár kha, bórok khár kha!” Khibiui klangmarokno khe bwrwirok nogo banta khe na-o,

¹³bórok merarokno kuto tong phano tokthuni kangkhungrok rukphai bai khe kholobwi tono aboni tokrang khe rangchak bai bóljak.

¹⁴Kwplaisa Kaitor habugrarokno aro pisa-piring khlai phuru abo Salmon hathái saka-o kothor kwsap klai kha.

¹⁵O kotorma hathái, Basanni hathái; o Basanni kwbángma hathái bochlong!

¹⁶O hathái bochlongrok norok tamoni ano músú-ui naisik lai? o hathái’-ono Kaitor tongna muchungjago, Subraiyung aro mol brúmno tongnai.

¹⁷Kwbángma korai malkhungrok, lekhaui pái man ya, chisai-chisai, Subraiyung Sinai hatháini bini kwthar tongthai-o phai kha.

¹⁸Nwng kuchugo ka kha, khajakrokno khaui tlang kha, tei bororok rwmarokno yachak kha, aro tongwi kebengnairokni aroni suda, bo yachak kha, Subraiyung Kaitor arono tong phlai-o.

¹⁹Sal brúmno chwngno tẃinaisa Subraiyung hamchajak; Kaitor se chini mwthangnaisa. Sela

²⁰Chini Kaitor wng kha mwthangnai Kaitor, Subraiyung Kaitorni yago’-no thwimani yókna bo.

²¹Kaitor bini kebengnai arirokni bokhorokrokno bukhrubwi páinai, lama hamya-o himnairokni khnai kupulung bokhorokno bukhrupnai.

²²Subraiyung hai hwnwi sa-o, “Ang bórokno Basanni kiphilwi tubunai, tei bórokno twijlang kuthukni kiphilwi tubunai,

²³hakhe nwng nini yakung thẃi-o chomsaui mannai, tei nini sẃirokni bwslairok kebengnai arirokni aroni banta mannai.”

²⁴O Kaitor ani Kaitor ani Bugra, nwng háyá kwtharo himwi thángma nukjago

²⁵rwchapnairok khe bwskango tammung tamnairok khe uklogo, bwrwi siklarok khe kwcharo tongwi kham lapsarokno tam lai-o:

²⁶“Borok kwbángma kuthum laithani Kaitorno hambai rw di, o Israilni bosongni phainairok Subraiyungno hambai rw di!”

²⁷Nai di dopha kusu Benjamin lama soui tẃimani. Aboni uklogo khe Juda bosongni tẃiphang bodolrok tei Jebulunni bai Naptali bosongni tẃiphangrok.

²⁸Nini phan kari si di, o Kaitor; swkango chini bagwi khlaimani a phanno phunuk si di o Kaitor.

²⁹Tamoni hwn ba Jerusalemni nini nok kwthar tongmani bagwi habugrarok nini bagwi hili tubu lai-o.

³⁰Twi rukungni bolongo tongnai yabrwirokno damrok di, musuk chwla bodolrokno tei dopharokni musuk bwsarokno damrok di. Yapharmungrokno manna muchungnairokno yakung bai káduljak thung; choba hamjaknai bororokno nwng oroi-poroi khlai di.

³¹Ha Ijipni pitol tubujak thung; Ithiopia Kaitorni thani yak phehelnai.

³²O bebak harok, norok Kaitorno lobwi rwchap di; Subraiyungno lobwi rwchap di, Sela

³³O agini nokha, nokharogo malkhung kaui berainaisa; bo khorang kotor khe kók samano.

³⁴Kaitorni phanno sakhlai di, bini chẃngsacha Israilrokni saka-o; tei bini phan nokha gwnangwi tongo.

³⁵Kaitor, Israilni Kaitor bini háyá-o kirimasingcha; bo bini bororokno phan tei suar rw-o. Kaitor hamchajak! Daudni rwchapmung