Read Kok Borok LOBMUNG 69 Bible Online

LOBMUNG 69 - Kok Borok bible

LOBMUNG 69

¹O Kaitor ano mwthang ja di, tamni hwn ba ani kotok jora twi kasasa kha.

²Yakung berathai kwrwi harbok kuthugo ang kwlwk kha; ang twi kuthugo klai kha, tei ani saka tẃi twi kotor láiwi tong kha.

³Ang kap máng kap máng lengpro kha, ani totra ranpra kha. Ani Kaitorno naising te naising te ani mokol nuk tha ya wng kha.

⁴Ano kwrwi kwrwi’-no naislernairok ani bokhorokni khnaini slái bángo; kwbángma’-no ano sokomorna nai-o, ano kebengnai arirok kwrwi kwrwino ano majra ber lai-o. Ma khokma kwrwi twtwi de ang ba ma su sinai?

⁵O Kaitor ang butua wngma nwng saui mano; ang cha ya khlaimarok nini bwskango huijak ya.

⁶O Subraiyung, sengkrak suarirokni Kaitor ani bagwi nono bwkha beranairok lachimung ta man thung; O Israilni Kaitor nono naituknairok ani bagwi mwkhang man ya ta wng thung.

⁷Tamoni hwn ba ang nini bagwi hamya sajak kha, lachimung ani mwkhangno sók kha.

⁸Ani takhukrokni thani ang phatarsa wng kha, amani bwsarokni thani ang bui hai wng kha.

⁹Nini nokni bagwi bwkha ui-ui wngmani ano cháui pái kha; nono lachimasingcha khlainairokni lachimasingcha ani saka-o klai kha.

¹⁰Ang ok bukcha tongwi koinene wng khe, bórok aboni bagwi ano lachi rw-o.

¹¹Ang rí sola kan khe chum khe, aphuru khe ang bórokni kók thesra karijaknai se wng si-o.

¹²Duglamo achugwi kók kepek sa lainairokni kók bothoma se wng si-o, ang chuak kephekrokni rwchapmungrok se wng si-o.

¹³Tamo khe o Subraiyung, ang nono suri ja-o. O Kaitor nini khairokma mannani jora-o, nini pái phlai ya hamjakma kwbángma khe mannani jora-o nono suri ja-o, nwng omono khna ja di. Nwng kók narwgwi chubama bai

¹⁴ang kwlwgwi tongmani aroni sochaui mwthang ja di; ano kebengnai arirokni yakni tei twi kuthukni mwthang ja di.

¹⁵Twi torwi twi lommani ani saka twi ta lái thung, eba twi kuthuk ano ta monok thung, hakhorbo bini búkhúgo khiklaiwi ano ta monok thung.

¹⁶O Subraiyung ani ringma khna ja di, tamni hwn ba nini pái phlai ya hamjakma le kaham; nini khairokma kupulung bai ani bwkhak mwkhang rw ja di.

¹⁷Nini selengni aroni nini mwkhangno ta hui ja di, tamni hwn ba ang tong kesebo klai tong kha, dakti ani sanmano khna ja di.

¹⁸Ani samo phai di, ano phiyók phai di ano kebengnai arirokni yakni ano phiyók ja di.

¹⁹Ang lachimung rwjakmano nwng si-o, tei ani lachimungno tei ang mwkhang man ya wngmano nwng si-o; ani kebengnai ariroknobo nwng sini-o.

²⁰Lachimung manẃi ani bwkha bái kha, hakhe ang bwkha thwi kha. Ang khairokma de manno nai kha, tamo khe khoroksa phano khairoknai kwrwi; ano bwkha kwchang rwnaibo khoroksa phano kwrwi kha.

²¹Bórok ano chámung rw thani thwijaknai manwi rw kha, ang twi kang phuru khe ano kwkhwi-mecher nungna rw kha.

²²Bórokni sakni khalai’-no bórokni khẃi wng thung, bórokni ratharwi barokmungni terrok bórokni khẃi wng thung.

²³Bórokni mokol mwnak wngwi nuk ya wng thung; tei bórokni bwchang jangrijak máng tong thung.

²⁴Nini jolima bórokni saka-o lukhlai rw di, tei nini jolima bai bórok khamwi pái rwjak thung.

²⁵Bórokni tongthai bukcha wng thung; bórokni kainogo khoroksabo ma ta tong thung.

²⁶Tamoni hwn ba bórok nwng sátokma bororokno bórok sátogo tei nwng swprakma bororokno bórok teibo swprak kha.

²⁷Bórokni majrani saka teibo majra rw di; bórok nini aroni ta ma yók thung.

²⁸Bórok kwthangrokni bijapni hujagwi pái thung; borok kahamrok bai baksa bórokni mung ta tisajak thung.

²⁹Tamo khe ang le birman nangjak tei dukhu gwnang ja se; o Kaitor nini mwthangma ano kati rwui ton thung.

³⁰Ang Kaitorni mungno lobwi rwchapnai; ang bono hambai rwui bono bórom rwnai.

³¹Omono Subraiyung, bokorong gwnang tei yáskú gwnang musuk chwlarokni slái bwkha phurjaknai.

³²Koinene bororok abono nugwi bwkha tongthokjaknai; Kaitorno naituknairok norokni bwkha thangsa thung.

³³Tamoni hwn ba Subraiyung bigrarokni kókno khna-o, tei bo bini khajakrokno khibi ya.

³⁴Nokha tei ha bono lob thung, twijlang tei aro tongnairokbo bono lob thung.

³⁵Tamoni hwn ba, Kaitor Siyonno mwthangnai tei ha Judani kamiyungrokno tisa phinai, hakhe aro selengrok tongnai tei abono mannai;

³⁶bini selengrokni bosongno abono narwknai, tei bini mungno hamjaknairok bórok aro tongnai. Daudni rwchapmung; kapmung