Read Kok Borok LOBMUNG 7 Bible Online

LOBMUNG 7 - Kok Borok bible

LOBMUNG 7

¹O Subraiyung ani Kaitor, ano sátoknairokni yakni ano mwthang ja di, ano phiyók ja di, nini thani ani bwkha bera ja-o;

²wng ya khe bórok ano singho uáthar tẃi khe uátharnai; bórok ano phondrik-phandrak khlainai, ano mwthangnai tong glak.

³O Subraiyung ani Kaitor, ang abo khlaima tong khe, ani yak bai samung hamya tangma tong khe,

⁴ang bai kwchang kwchang khe tongnaino hamya khlaima tong khe eba ani kebengnai arirokno ereng erengno sekpro khe,

⁵kebengnai arirok ano riphrigwi rom thung, ani langmano ha-o kádul thung, tei ano ha-o phobwi pái thung. Sela

⁶Joliui bacha di, o Subraiyung; ani arirokno joliui kebengwi bacha di; bacha di, o ani Kaitor; nwng buj thumna chongjak.

⁷Lukurok nono kitingwi bacha thung, bórokni saka-o achugwi bugra chá thung.

⁸Subraiyung lukurokni buj thumo; O Subraiyung ani sutrangno naiwi ani samungno naiwi ano buj thum di.

⁹Borok hamyarokni samung hamyarok mwthakjak thung, tamo khe sutrangrokno songchaui tisa di. O Kaitor kahamsa, Nwng se bwkha tei uansukmano chánai-o.

¹⁰Ani phui le Kaitorni thani se, bo se bwkha sóirokno mwthango.

¹¹Kaitor khe sói khe buj thumnai, Kaitor borok hamyarokno sal brúm jolijago. Bo sal brúmno borok hamyarokno jolijagwi tongo.

¹²Tumungno khoroksa swk bwkha kiphil ya khe Kaitor bini sengno hulnai; bo bini badukhungno mokhongwi thonnai;

¹³bo bini butharjaknai manwirokno tiyar khlai kha, hór gwnang chakhlarok snamwi ton kha.

¹⁴Nai di, bórok bahai khe hamyano ogo chu tei tongmung sitra bai bahai khe sak kupulung wngwi tatalrokno bá.

¹⁵Bórok hakhor khur lai-o, bórok khur laimani hakhoro’-no bórok klai-o.

¹⁶Bórokni tongmung cha yarok bini bokhorogo’-no klainai tei bini thamchi tungjak samungrokni manthai bini talikha’-ono klainai.

¹⁷Ang Subraiyungno bini samung kahamni bagwi lobnai, kuchuk kuk Kaitor Subraiyungni mungno lobwi rwchapnai. Rwchapmung tẃithernai bokhorokni bagwi buduk gwnang tamjaknai bai khe Daudni rwchapmung