Read Kok Borok LOBMUNG 71 Bible Online

LOBMUNG 71 - Kok Borok bible

LOBMUNG 71

¹O Subraiyung, ang nini thani tongthai na ja-o; ano uáisa phano lachimung ta man rw di.

²Nini kaham bai ano mwthang ja di, ano phiyók ja di; ani bwkhak nini khunju kai ja di tei mwthang ja di.

³Ano kati rwna bagwi nwng ani kati rwnai holongthai, nok kwrak wng di, tamni hwn ba nwng ani holongthai tei katijaknai nok kwrak.

⁴O ani Kaitor, ano borok hamyani yakni, samung hamya tangnaini yakni tei khairokma kwrwini yakni phiyók ja di.

⁵Tamoni hwn ba o Subraiyung, nwng se ani khatungma, chwrai phangsinini simi nwng se ani bwkha berajaknai.

⁶Ang achai phuruni simi nini jarwi se sungchajagwi tongo; amani ogo tong phuruni simi nwng’-no ano nai-o. Ang nono lob phlai máng tongnai.

⁷Borok kwbángmani mokolo ang phunugui sajaknai se wng si-o, tamni hwn ba nwng’-no ani tongthai nok kwrak.

⁸Sal sapung ani búkhúgo nini lobmung kupulung khe tei nini chẃngsachani kókno saui tongnai.

⁹Ang ráui tháng phuru ano ta khibi ja di; ani phan pái phuru ano ta yakar ja di.

¹⁰Tamoni hwn ba ani kebengnai arirok ano tẃi kók sa lai-o, ano butharna ampanairok pal khe kók chap lai-o.

¹¹Bórok hai hwnwi sa lai-o, “Kaitor bono yakar kha; bono riphrigwi rom di khoroksa phano bono phiyóknai kwrwi.”

¹²O Kaitor, ang bai ta chal ja di; o ani Kaitor ano dakti chuba ja di!

¹³Ano majra bernairok bórok lachima man thung tei komor thung; ano swprakna nainairok lachimung manẃi bumkhang sókjak thung.

¹⁴Tamo khe ang nono khatung phlai máng tongnai, tei lobma saka lobnai.

¹⁵Ang ani búkhúk bai nini samung kahamrokno tei nini mwthangmano sapung sa máng tongnai, tamni hwn ba abórok bwswk ang saui man ya.

¹⁶Ang Subraiyung Kaitorni phan kwrakni samungrokno lob tw tẃi phainai, ang nono simi’-no, nini kahamno lobwi rwchapnai.

¹⁷O Kaitor nwng ano chwrai phuruni simi’-no phrwng kha, tei nono tabukbo nini uanamasingcha samungrokno saui tongo.

¹⁸Hakhe ang raui khnai kuphur wngwibo, o Kaitor ano ta yakar ja di, thinangni pirini joto bororokno nini phanno si rw ya sak ano ta yakar ja di. Nini phan

¹⁹tei hammabo nokharok swk kuchuk, o Kaitor. Nwng samung kotorrok khlai kha, O Kaitor nwng hai tei sabo tong?

²⁰Nwng se ano kwbángma digi-sigirok tei chacharara manjak rw-o, tei nwng’-no ano thangcha rw phinai; hakhor kuthukmani nwng’-no ano tisa phinai.

²¹Nwng ani bórom báng rw kha, tei bwkha kwchang rw phinai.

²²O ani Kaitor ang nono chongpreng tamwi nini kók narwkmani bagwi lobnai, o Israilni kwtharsa ang nono donidong-dorong tamwi rwchabwi lobnai.

²³Ang nono lobwi rwchap phuru búkhúk bai khorang sotonwi tongthogwi rwchapnai; nwng mwthangmani bagwi ani langmabo tongthokjaknai.

²⁴Ani búkhúk bai sal sapung nini kaham bai chubamani kókno sanai, ano dera rwna nainairok lachimasingcha khe mwkhang sókjak kha. Solomonni rwchapmung