Read Kok Borok LOBMUNG 74 Bible Online

LOBMUNG 74 - Kok Borok bible

LOBMUNG 74

¹O Kaitor nwng chwngno tamo wngwi khibi súk lang? Tamoni nini sulani mwrwkma merarokni bagwi nini jolima hoku ongkhor?

²Bisi kwbángma swkangni simi kusung kusungo nwng chongwi naui phiyógwi nini borok khlaimani nini bororokno muitu khlai ja si di; nwng tongna hwnwi ongkhorwi phaimani a Siyon hatháino muitu khlai di.

³Nini yapri komor phlaijak phaising séui phai di; kebengnai arirok háyáni bebakno sokomor kha.

⁴Nini háyá kwcharo kebengnai arirok sokrom lai kha; aro bórok bórokni sinimung marino kái kha.

⁵Hapsonma buphangni dugarrokno bórok ruarok bai tan bai kha.

⁶Ruarok bai tei tokhrupjaknairok bai tankhurwi naithok khe bumul saijakrokno bórok swbai bai kha.

⁷Bórok nini háyáno hór bai sók kha; nini mungni tongthaino kwthar ya khlai kha, abono ha-o khiklai kha.

⁸Bórok kiching bórok hai hwnwi sa lai kha, “Chwng bórokno uáisa bai’-no yapha-o khe segwi naui páinai;” bórok Kaitor bai malaijaknai o hani bebak nokrokno sógwi pái bai kha.

⁹Chwng chini bumul marirokno nuk li ya; aro tei diyarirok kwrwi kha tei chini bisingo khoroksa phano omo hai bwswk tongnai saui mannai kwrwi.

¹⁰O Kaitor, kebengnai arirok tei bwswk kók hamya sano? Kebengnani arirok mol brúmno da nini mung hamya sanai?

¹¹Nwng ba tamo yak kwbagwi tong lang; tamoni nini khaklabo yak kwbagwi tongmani aroni yak tikhlai ya wng?

¹²Hai phano yaphangni simi’-no ani Kaitor ani bugra, swngcharo mwthangnaisa.

¹³Nini phan bai nwng twijlangno swkago; nwng twi-o tongnai dragonrokni bokhorokno sukhrubo.

¹⁴Nwng’-no Lebiathonni[28] bokhorokno swbai-o; hasing panthoro tongnairokno bini bahanno chánani rw kha.

¹⁵Nwng se twimuk rwui twisa twi kochok rw-o; ran phlai ya twikherengni twinobo nwng’-no ransa rw-o.

¹⁶Horbo nini’-no salbo nini’-no; nwng’-no kipir khlainairokno tei salno snamo.

¹⁷Nwng’-no o hani ari boui rw-o; masing bai sachlangno nwng’-no snam kha.

¹⁸Omono muitu narwk di, o Subraiyung kebengnai arirok bwswk se hamya sa lai tei tongmung sitra tongnairok nini mungwi hamya sa kha.

¹⁹Nini tokthuni langmano bolongni thamchi kutung yabrwirokni thani ta yaphar ja di; nini bigrasarokno pok súgwi ta tháng ja di.

²⁰Nini a swmaini kókrokno naiwi nai ja di, tamni hwn ba ha-o mwnakma tei ur pati laima báng kha.

²¹Kusupjak-swklwkjak bororokno lachimung ta rw di; bigrarok tei biyalo klaijakrok nini mungno lob lai thung.

²²Bacha di, o Kaitor, nini sakni bagwi buj thum si di; bwswk khe o borok hamyarok sapung sal kolok nono hamya sa lai muitu khlai di.

²³Nini arirokni samarokno ta pok di, nono kebengnairok golok golok wng laimani cho phlai yaui tongo. Asapni rwchapmung