Read Kok Borok LOBMUNG 79 Bible Online

LOBMUNG 79 - Kok Borok bible

LOBMUNG 79

¹O Kaitor, Dopharok nini bisingo hap phai bai kha; bórok nini noktharno kwthar ya khlai kha; bórok Jerusalemno sokomor kha.

²Bórok nini selengrokni mang kwthwino nokhani tokrokno chá rw kha, nini kók khnaui tongnairokni bahanno khe hakungni yabrwirokno rw kha.

³Bórok, bórokni thẃino twi hai khe Jerusalemni yang ayang lukhlai kha, tei bórokno phobnai khoroksa phano kwrwi kha.

⁴Nok arirokni thani chwng mwnwimung se wng si-o, chini yang ayang tongnairok bai mwnwiwi thesra se karijak si-o.

⁵O Subraiyung tei bwswk? Nwngba joli máng de tong sinai? Nwng risi nangwi thamchi tungma tei bwswk hór hai khe chẃng sinai?

⁶Nono sini ya dopharokni saka-o nini jolima lukhlai rw di, tei nini mungwi ring ya harokni saka-o nini jolima khiklai di.

⁷Tamoni hwn ba bórok Jakobno monok kha tei bini tongthaino bukcha khlai kha.

⁸Chini chuchusongni samung hamyani bagwi chwngno ta rom ja di, nini khairokma bai dakti chini nangmano rw ja di, tamni hwn ba chwng báikhrubwi klai súk kha.

⁹Nini mung chẃngsa rwna bagwi o chwngno mwthangnaisa Kaitor chwngno chuba ja di; nini mungni jarwi chini sumsokrok su-ui rw di tei phiyók ja di.

¹⁰Dopharok tamoni “Buko bórokni Kaitor?” hwnwi sẃngnai, nini selengrokni thwi yormani yagul nwng su-o, chini bwskango’-no bórokno abono saui man thung.

¹¹Khajakrok kengaimani nwng khna thung; thwina bagwi chongjakrokno nini phan kwrak phan bai mwthangwi narwk di.

¹²O Subraiyung, chini noksa-nok arirok nono mwnwi laimani aboni yagulno nwng bórok khlaimani slái tei uáisni kwbáng khe bórokno kiphilwi su di!

¹³Hakhe chwng nini bororok nini mwrwkma merarok nono hambai rw phlai máng tongnai; chini bosongrok kusung kusung chwng nono hambai rwui lobwi tongnai. Rwchapmung tẃithernaini bagwi Asapni rwchapmung