Read Kok Borok LOBMUNG 80 Bible Online

LOBMUNG 80 - Kok Borok bible

LOBMUNG 80

¹O Israilno mwrwknaisa khna ja di, nwng Josepno mera bodol hai khe béngo! nwng cherubni saka-o tongnaisa, nwng chẃngsa di

²Ephraim, Benjamin tei Manaseni bwskango. Nini phanno tikhlai di, tei phaiwi chwngno mwthang phai ja di!

³Chwngno mwthang ja phi di, o Kaitor; tei nini mwkhang chẃng thung, hakhe chwng mwthangjak anw.

⁴O Subraiyung phankrak Kaitor, nwng nini bororokni surimarokno tei bwswk joliui tong sinai?

⁵Nwng bórokno muktwini mai chá rw kha, tei kwbángmano muktwi khan kha.

⁶Nwng chwngno chini arini dopharokni thani sak nang ya khlai kha; chini kebengnai arirok bórok kiching bórok mwnwi lai-o.

⁷Chwngno mwthang ja phi di, o Kaitor; tei nini mwkhang chẃng thung, hakhe chwng mwthangjak anw.

⁸Nwng Ijipni angur phangsa tubu kha; dopharokno rwkhlaiwi nwng abono kái kha.

⁹Nwng bini bagwi ha sai kha tei abo yarwng kuthuk sukhlaiwi ha gwnangwi supung kha.

¹⁰Bini saklom bai hatháirok kholopjak kha, bini bedekrok kotorma sidarphangrokno kholop kha;

¹¹aboni bedekrok twijlang jora tei twima jora bini buprarok suhor bai kha.

¹²Nwng tamoni bini chokdeualrokno swbai lang? hakhe lama tẃi láinairok bini bwtháino khak glak da?

¹³Bolongni uak abono chá phai kha, tei bari tẃi láinairok abono chá lai kha.

¹⁴O phan kwraksa Kaitor, nwng kiphil ja di; chuknohani naikhlai nai ja di; o angurno nai ja di,

¹⁵nwng nini yagra yak bai káimani buphangno.

¹⁶Bórok abono hór bai sók kha tei tamphai kha; nwng damrokma bai bororok ma komor thung.

¹⁷Tamo khe nini yagra yak nini yakni borokni saka-o tong thung, nini bagwi nwng kwrak khlaima borokni saka-o tong thung.

¹⁸Hakhe chwng nini aroni kiphil glak; chwngno thangcha rw di hakhe chwng nini mungno ringnai.

¹⁹Chwngno mwthang ja phi di, o Kaitor; tei nini mwkhang chẃng thung, hakhe chwng mwthangjak anw. Rwchapmung tẃithernaini bagwi buduk gwnang tammung tamwi rwchapjaknai Asapni rwchapmung