Read Kok Borok LOBMUNG 94 Bible Online

LOBMUNG 94 - Kok Borok bible

LOBMUNG 94

¹O Subraiyung, nwng yagul sunaisa Kaitor, o yagul sunaisa Kaitor, nini pohor chẃng rw si di!

²Bacha di, o hano buj thumnaisa; kung chuknairokno bórokni manthaino rw di!

³Subraiyung, borok hamyarok tei bwswk, tei bwswk borok hamyarok kwplai wng sinai?

⁴Bórok kók hamyarok máng sa lai-o, samung hamya tangnairok joto se kók kotor sa lai-o.

⁵O Subraiyung, nini bororokno bórok sekrubo, nini bororokno sátogo.

⁶Randijwkrokno tei sini ya bororokno bórok butharo, ma-pha kwrwirokno bórok butharo,

⁷bórok hai hwnwi hwn lai tiro, “Subraiyung nu se nuk ya; tei Jakobni Kaitor abono mungsa sak nangjak ya.”

⁸O butua kuksarok uansuk si di; nwng tei buphuru siyan gwnang wng sinai?

⁹Khunju snamnaisa bo khna glak da? Mokol snamnaisa bo nuk glak da?

¹⁰Dopharokno phrwngwi tẃinaisa, bororokno si rwnaisa bo swprak glak diba?

¹¹Subraiyung chini uansukmarokno saui mano, abórok mungsa buya hwnwi bo si-o.

¹²Nwng bai khoraijaknai borok hamchajak, nwng bórokno nini kerongno phrwngo, o Subraiyung,

¹³borok hamyani banta hakhor khurjak ya sak nwng bórokno jora hamya phuru lengla rwui tono.

¹⁴Tamoni hwn ba Subraiyung bini bororokno khibi glak; bo bini sakni manwino yakar glak;

¹⁵tamni hwn ba bujsói khlaijaknai, tei bwkha kuphurrok abono khnaui tongnai.

¹⁶Sabo ani wngwi borok hamyarokno kebengwi bachanai? Ani wngwi sabo samung hamya tangnairokno kebengsaui bachanai?

¹⁷Tumung Subraiyung ano chubaui tong ya khe ani phola daktino thwiwi siring siring[36] wngwi tongwi kha mun.

¹⁸“Ani yapri kásle kha,” hwnwi ang uansuk phuru khe o Subraiyung nini pái phlai ya hamjakma ano chuba kha.

¹⁹Ani bwkha-o dudru-mudru wngwi phai phuru nini bwkha kwchangmungrok ano bwkha srang rw kha.

²⁰Hamyasani bokhorok bo samung hamyani bagwi raida snamo bo bai nini tamo gwda-gormo tong lai man?

²¹Bórok sutrang borokno kebengsaui kuthum lai-o, tei borok kahamno buthar laina bagwi majra ber lai-o.

²²Tamo khe Subraiyung ani kati rwnai nok kwrak, ani Kaitor ani khorok bomthaini holongthai.

²³Bo bórokno bórokni samung hamyani manthaino rwnai, bórokni samung sitrarokni bagwi bórokno pái khibinai; Subraiyung chini Kaitor bórokno sokomor súgwi páinai.