Read Kok Borok LOBMUNG 97 Bible Online

LOBMUNG 97 - Kok Borok bible

LOBMUNG 97

¹Subraiyung se bugra! ha srang thung; twi kwcharni harok bwkha tongthok thung!

²Bini yang ayang chumui bai mwnaksajak; sutrang bai bujsói se bini achukthayungni yaphang.

³Hór bini swkang swkang thángo, yang ayangni bini kebengnai arirokno sógwi pái-o.

⁴Bini nokha philiksama bai swngcharno pohor khlai kha; ha abono nugwi kwlwibra kha.

⁵Subraiyungni bwskango hatháirok mundai hai khe gele kha, swngchar gwnangwini Subraiyungni bwskango.

⁶Nokhayungrok bini bujsóini kókno sakhlai kha; hakhe bebak bororok abono nuk kha.

⁷Takjak mwtaino surinairok, mwtairokno tẃi kók kotor sanairok ma lachinai; bebak mwtairok bini thani khorok bom bai thung.

⁸O Kaitor, Siyon khnaui tongthokjago, tei ha Judani kamiyungrok nini bujsóino tẃi tongthogo.

⁹O Subraiyung nwng’-no ha sakani kuchuk kuk; nwng’-no bebak mwtairokni slái kuchugo.

¹⁰Hamyano selengnairokno Subraiyung hamjago; bo bini kók khnaui tongnairokni langmano mwrwgo; bo bórokno borok hamyarokni yakni phiyógo.

¹¹Borok sutrangrokni bagwi pohor chẃngsa-o tei bwkha srai-srairokni langma-o tongthok rw-o.

¹²O borok sutrangrok Subraiyungo tongthok di, tei bini mung kwtharno hambai rw di! Rwchapmung