Read Kok Borok PHRWNGMUNG 1 Bible Online

PHRWNGMUNG 1 - Kok Borok bible

PHRWNGMUNG 1

¹Daudni bwsla, Israilni habugra Solomonni phrwngmung kóktháirok:

²Bororok siyan gwnang wngnani, rwngmung kahamno rwngnani tei kók kuthukrokno romwi manna bagwi omorokno swijak kha,

³srai-srai khe samungo yak rwnani, sói kaham khe buj tẃiwi tei naithok khe tongna phrwngo;

⁴borok butuarokno simung si rwnani, siklarokno siyan kwrwng tei uansukmung gwnang wng rwnani

⁵tei sinai borok abono khnaui teibo kubuk wng thung hwnwi, siniui chongnani rwngmani

⁶omo hai khe bórok phrwngmung kóktháirokno romwi mannani tei sinai bororokni kókrok buchinani tei bórokni kók phumukmungrokno buchina bagwi se.

⁷Simungni yaphang khe Subraiyungno bórom khlaima se; butuarok khe simungno tei phrwngmano sak nangjak ya.

⁸Angsla, nwphani phrwngmungrokno khna di tei nwmani phrwngmano sak nangjak ya ta wng di;

⁹tamni hwn ba abórok, nini khorokno mwchang rwnai khumtrang tei nini kotokni rang bwtang hai wngnai.

¹⁰Chwlasa, sumsok gwnangrok nono yak so khe ta khna di.

¹¹Tumung bórok “Phai di, chwng khoroksa swkni thẃi kochok rwna bagwi huijak laiwi tong lai anw, borok kahamrokno butharwi tongthokna huijak laiwi tong lai anw;

¹²hakhor kuthuk hai khe kwthangwi’-no bórokno monok lai anw tei hakhor kuthuk bisingo thángnairok hai khe bebakno monok lai anw.

¹³Hakhe chwng bebak manwi morokrokno man anw; chwng chini nokrokno segwi tubuma manwi bai supung anw.

¹⁴Nwngbo chwng bai baksa pat kasa rwui banta thwk di; chini jotoni rang bogol kaisa se wngnai” hwnwi sa khe,

¹⁵chwlasa, nwng bórokni a lama-o ta him di, nini yaprino bórokni a lama bai hakchal khe ton di;

¹⁶tamni hwn ba bórokni yapri hamya-o thángo tei bórok thẃi khiklaina khe kodo.

¹⁷Tamni hwn ba tok masa swkni mokol bwskango khẃi thonma le mungsa chúk ya;

¹⁸hai phano a bororok baithangni thẃi kochok rwna bagwi se naising laiwi tong lai-o! Bórok sak sakno butharna bagwi se naising laiwi tong lai-o!

¹⁹Omo tẃi khe khámaiwi manna muchungnairok le hai kheno páinai; abono mannairok abo bai gaija rwui páijaknai.

²⁰Simung laharo sotonwi chirigo; hati-haba-o khorang tor rw-o.

²¹Borok kupulung laharni lamprarogo bo chirigo; kamiyungo hapma duglam kotorrogo bo kók sa-o:

²²“O butuarok, norok tei bwswk butua wngwi tongnano hamjagwi tong sinai? Buino hamya sanairok tei bwswk hamya máng saui tongthok sinai? Butuarok tei bwswk simungno chajak ya khe tong sinai?

²³Ani khoraimano khna di; ang norokni thani ani uansukmano lukhlai rwnai; ang ani kókrokno norokno si rwnai.

²⁴Tamni hwn ba ang ringma se norok khnana nai li ya, ang yak pholokma se khoroksa phano sak nangjak li ya,

²⁵tamni hwn ba ang samano norok sak nangjak li ya ani khoraimanobo khoroksabo khna li ya,

²⁶angbo nini digi-sigi-o mwnwinai; norok kirima-o klai phuru khe ang nono thesra karinai,

²⁷nokbar kotor hai khe nini thani kirima phai phuru khe tei tong kesep bangkundri hai khe nono gerepsaui phai phuru, dukhu-birmanrok nini thani phai phuru khe ang thesra kariui mwnwinai.

²⁸Bórok aphuru khe ano ring lainai, hai phano ang khna glak; bórok ano kaham khe naituk lainai, hai phano bórok ano nuk glak.

²⁹Tamni hwn ba bórok simungno naislerjak kha tei Subraiyungno bórom khlaiwi kirinano

³⁰chongwi na li ya, aboni bagwi ani phrwngma kókno khunju kan li ya tei bebak ani khoraima khibi bái kha,

³¹aboni bagwi bórok samung tangma tẃi’-no bwthái mannai, bórokni samung bai’-no bórok uárjaknai.

³²Aboni bagwi butuarok lama cha ya-o thángma bagwi bórok thwinani ma nangnai tei uansukna rwng yarokni uansukmungrok bórokno sokomornai;

³³tamo khe ani kók khnanai borok bo kiri yaui tongwi mannai, tei kwchang kwchang khe tonnai, hamyano kiri glak.”