Read Kok Borok PHRWNGMUNG 10 Bible Online

PHRWNGMUNG 10 - Kok Borok bible

PHRWNGMUNG 10

¹Solomonni phrwngmung kóktháirok. Siyan gwnang bwsa hwn khe buphani mwkhang chẃng rw-o, tamo khe bwsa butua khe bumano bwkha swbai-o.

²Samung hamya bai ajima rang-rí nini kaham khlai glak, tamo khe sói le nini langmano mwthangnai.

³Subraiyung borok sóirokno ma chá ya khe ton ya, tamo khe borok hamyarok manna muchungmano le man rw ya khlai-o.

⁴Yak seler khe nwng bigra wngnai, tamo khe yak kwsrang wng khe nwng gwnang khanai.

⁵Khá sinai bwsa hwn khe rana jora’-ono ra-o tei rana jora-o thu-ui tongnai bwsa khe lachimung se tubu-o.

⁶Borok sóirokni saka-o hamari klai-o, tamo khe borok hamyarokni khugo khe uálaimung máng tongo.

⁷Borok kahamrok khe bórok hamari se hwnwi muitu khlaijaknai, phiya borok hamyarokni mung khe sógwi thángnai.

⁸Khá sinai borok khe dagimarokno khna-o, phiya kók swbaknai butuarok khe komorwi thángo.

⁹Kók bai samung bai gothokjak khe tongnairok khe kirina kwrwi khe tongwi mannai, phiya lama cha ya himnairok khe bo manjagwi páinai.

¹⁰Mokol tail khe kók sama uálaimung se tubu-o, phiya khá torwi khoraima khe tong kwchang tubu-o.

¹¹Borok sóirokni khukni kók khe langmani twimuk, tamo khe borok hamyarokni khugo khe uálaimung huijak tongo.

¹²Naislerma khe jolimungno báng rw-o, phiya hamjakma khe bebak hamyarokno kobolo.

¹³Sinai borokni thani khe elemni kók tongo, phiya butuarokni phikungni banta khe raidang tongo.

¹⁴Siyan tẃinairok khe elem se thumo, tamo khe butuarok golok-golok wng khe komormung se sampha-o.

¹⁵Rang-rí se gwnangrokni nok kuchuk; biyal se bigrarokno sokomoro.

¹⁶Borok sóirokni samungni manthai khe langma rw-o tei borok hamyarokni manmarok khe sumsok báng rw-o.

¹⁷Phrwngma kókno khunju kannai borok khe thangnani lama-o, tamo khe khoraimungno khna ya borok khe lama koróui phérwi thángo.

¹⁸Tatal sanairok sejamung se huiwi tono tei buini mungwi kók hamya sanairok khe butua se.

¹⁹Kók kwbángma wngma-o aro cha ya kwrwi wng ya, tamo khe siyan kwrwngrok khe kók sa tha yaui tongo.

²⁰Borok kahamni bwslai khe rukphai saijak hai; tei borok hamyani uansukma le mungsa chúk ya.

²¹Borok kahamni kók, borok kwbángmani kaham khlai-o, tamo khe butua khe khá si yani bagwi ma thwi-o.

²²Subraiyungni hamari se gwnang khlai-o tei bo aro mungsa dukhuno dal ya.

²³Cha ya khlaima khe butuarokni thwngmung se, tamo khe siyan kwrwng bororok khe elemno tẃiwi tongthogo.

²⁴Borok hamyarokni saka-o bwswk se kirimasingcha hamya phaino, tamo khe borok kahamrokni muchungmano khe bo rwnai.

²⁵Nokbar kotor phai khe borok hamyarok kwmaui tháng báinai, tamo khe borok sóirok khe mol brúmno tong phlainai.

²⁶Buani bagwi kwkhwi tei mokolni bagwi khe hokurok wng tẃi, abo hai’-no selerno samung tholnaibo haino wngjago.

²⁷Subraiyungno kirima le umor kolok wng rw-o, tamo khe borok hamyarok khe jora sók phai ya sini’-no gaijanai.

²⁸Borok kahamrokni khatungma-o khe tongthokmung tongo, tamo khe borok hamyarokni mungsa khatungmung kwrwi.

²⁹Subraiyungni lama se borok sóirokni kati rwnai nok kwrak, tamo khe samung hamya khlainairok khe komornai.

³⁰Borok sóirok uáisabo norjak glak, tamo khe borok hamyarok le ha-o ma tong glak.

³¹Borok sóirok khe elemni kók sa-o, tamo khe kók hamya sanairokni búkhúk khe muthubwi rwjaknai.

³²Borok kahamrokni khúk buboba cha buboba cha ya si-o, tamo khe borok hamyarok khe kók bejua máng sa-o.