Read Kok Borok PHRWNGMUNG 12 Bible Online

PHRWNGMUNG 12 - Kok Borok bible

PHRWNGMUNG 12

¹Siyanno hamjaknai borok bini cha ya phuru khoraijak khe hamjago, tamo khe khoraimano naislerjaknairok khe butua se.

²Borok kahamrok khe Subraiyung bai khásukjago tamo khe hamya chapnairok khe naislerjago.

³Khoroksa phano samung hamya bai songchajagwi man ya, phiya borok sóini yarwng khe ninang glak.

⁴Hik kaham hwn khe bwsaini khorokni motok, tamo khe lachi rwnai bwrwi khe bwsaini bekrengno sok rwnai hai.

⁵Borok sóirokni uansukmung khe sói; tamo khe borok hamyarokni kókbiti le bandina máng.

⁶Borok hamyarokni kókrok le huijagwi tongwi butharnani kókrok simi se, tamo khe borok kahamrokni kók khe bórokno phiyógo.

⁷Borok hamyarok sokomorjagwi pái-o, bórok kwma súgwi páinai, tamo khe borok sóirokni núkhung le bachaui tong phlainai.

⁸Siyan kwrwngrok khe lobjaknai tei bwkha sitrarok khe sak nangjak ya wngnai.

⁹Nogo chána mai kwrwi twtwi borok kotor wngsa tirwi phunukmani slái borok kotor wng yaui’-no nogo seleng narwkmani se ham kugo.

¹⁰Borok sóirok khe bini mal-matarokni nangmungrokno si-o, tamo khe borok hamyarokni khe thopsa phano khairokma kwrwi.

¹¹Sakni bari-o samung tangnairok bórokni chámung kwbángma wngnai, tamo khe chúk ya-sók yarokni utung-utung wngnairok le butua gwja.

¹²Borok hamyarok khe samung hamya tangna simi se naitugo, tamo khe borok sóirok khe bwthái thái-o.

¹³Borok hamyarok bórokni khukni cha ya kók bai’-no romjago, tamo khe borok sói khe jwngjalni yógo.

¹⁴Borok sakni kókni jarwi kaham bai kupulung wngwi mano tei borokbo baithang tangmani sakno sokat mano.

¹⁵Butua bo bini sak-sakni lamano sói wngjago, tamo khe siyan kwrwng khe kókbitino khna-o.

¹⁶Butua thamchi tungjak khe uáisa bai’-no sijago, tamo khe tei siyan gwnang borok khe thesra karijakmano sak nangjak ya.

¹⁷Kók kubui sanai borok bo bujo kubui kók sa-o, tamo khe tatal sakkirok khe bandiui kók sa-o.

¹⁸Ailang-kuilang kókrok seng bai kwsa cha rw tẃi khlai-o, tamo khe siyan kwrwng bororokni kókrok khe kwsa se ham rwui mano.

¹⁹Kók kubui sanai kók le tong phlainai, tamo khe kók tatal sanaini kókrok le srapsani bagwi se.

²⁰Hamya chapnairokni bwkha-o bandina máng uansugo, tamo khe kókbiti kaham rwnairokni bwkha-o khe khakchangma kupulung tongo.

²¹Borok sóirok mungsa hamya manjak glak, tamo khe borok hamyarok khe tekto máng manjago.

²²Subraiyung tatal sanaino khe naislerjago, tamo khe sói khe tongnairokno khe hamjago.

²³Siyan kwrwngrok khe bini elemno hui tono tei butuarok khe butua uansukmungrokno píro.

²⁴Samung kwrak khe tangnairok khe twithernai wngnai tei selersarok khe seleng wng rwjaknai.

²⁵Uanama le borokni bwkhano swbai-o, tamo khe kók kahamrok khe khápang srang rw-o..

²⁶Borok sóirok khe bikichingsongno kaham kókbiti rw-o, tamo khe borok hamyarok khe lama koró rw-o.

²⁷Selerrok bórok manna muchungmano man ya tamo khe kwsrangrok khe morok manwi-khwnwi mannai.

²⁸Borok sóirokni lama-o khe langma tongo, a lama-o thwimung kwrwi.