Read Kok Borok PHRWNGMUNG 19 Bible Online

PHRWNGMUNG 19 - Kok Borok bible

PHRWNGMUNG 19

¹Kók tatal sanai butua borokni slái bigra wng phano kók bai samung bai sói khe tongma se ham kugo.

²Siyan kwrwi muchungma simi le kaham ya tei dosi-dophra wngnai borok khe bo lama se koró-o.

³Butuasani butua tongmung se bono sokomoro, hai phano bini bwkha-o khe Subraiyungno se jolijago.

⁴Rangchak-ríchak bayaprok báng rw-o, phiya bigrasani khe kichingrok se bono khibiui kháro.

⁵Tatal khe kók sachrunai majra ma chánani yók glak tei tatalsabo yók glak.

⁶Borok kwbángma’-no borok kotor bai mokol kaijakna nai-o: Tamo khe hili rwnairok se bo bai bayap khaui mano.

⁷Bigrasani takhukrok se bono naislerjak khe, bikichingsong bo bai bwswk se hakchalo thángno? Bórokno ring phano khoroksa khna glak.

⁸Siyan kwrwng wngma le sakni langmano hamjakma se; khá sinai wngnai khe hamchanai.

⁹Tatal khe bujo kók sachrunai borok majra man yaui tong glak tei kók tatal sanai borok bo ma gaija langnai.

¹⁰Butuasa le asuda khlaiwi tongthothok cháthothok khe tongwi mwchang ya, selengbo bini bugrani bokhorok wngwi tongmani teibo mwchang ya.

¹¹Khá sinairok khe doui thamchi tungjak ya, phiya khoroksa swk bini cha ya khlai khe nuk ya hai khe tongma se bini bagwi chẃngsacha.

¹²Habugrani jolima wng kha singho sokrom tẃi se, tamo khe bini bwkha phurma wng kha sam saka-o pantwi hai.

¹³Bwsa butua hwn khe buphano swklwgo; tei uálai kwrak hik wng kha thop-thop khe uatwi klai tẃi se.

¹⁴Rang-mai tei nok-hukrok khe buphani aroni se mano, phiya khá sinai hik le Subraiyungni aroni se mano.

¹⁵Selerma abo muktrwi lik-lik khe phai rw-o; seler borok khe ok khuiwi ma tongnai.

¹⁶Kerong rákhogwi tongnai khe thangwi tongnai; sakni lamano sak nangjak ya wngnairok thwinai.

¹⁷Bigrarokno khairogwi rw khe Subraiyungno se lakai rwma klai-o tei bo bini a samung kahamni bebak su-ui rwjaknai.

¹⁸Nini chwraino khoraiwi phrwng di, aro khatungma tongo; bono sokomorna bagwi bwkha ta chap di.

¹⁹Thamchi kutung borok bo sakno aboni bagwi ma manjaknai; tumung nwng bono uáisa swk tong kesepni phiyók khe uái-re uái ma phiyók phinai.

²⁰Kók bitirokno khna di tei phrwngmarokno yachak di, hakhe nwng thinango sinai borok wngnai.

²¹Borok bwkha-o kwbángma’-no chapmungrok chabwi mano, tamo khe Subraiyungni muchung tẃi se wngnai.

²²Borok kók khnaui tongnai se wngthai, tatal wngmani slái bigra wngma se hamo.

²³Subraiyungno kiriui tongma le umor phologwi rw-o; abo bai bwkha khom-khom wngnai tei debo dera rwjak glak.

²⁴Selersa mairango yak suchon khe abono khochaui búkhúgo dana suda selerjago.

²⁵Buino thesra karinairokno swprak khe hakhe butuarok hus wng anw; siyan kwrwngrokno khorai khe bórok teibo rwngnai.

²⁶Buphano sátoknai tei bumano rwkhlainai bwsa khe bórokno lachimasingcha khlaiwi mwkhang sógo.

²⁷Sajla, nwng phrwngmano khnana nai ya khe hakhe nwng siyan elemni se kutulwi thángnai.

²⁸Tatal khe kók sachrunai le bujsóino se thesra kari-o, borok hamya khe samung hamyano monogo.

²⁹Thesra kariui mwnwinairokno sátokna bagwi tiyar khlaijak tei butuaroknobo phikungo swprakjaknai.